Sahna óneri arqyly karantındik, saqtyq sharalary men vaksınanyń mańyzdylyǵyna halyqtyń nazaryn aýdarýdy maqsat etken spektakl tolyǵymen ómirimizdiń qazirgi bolmysyn kórsetetin shynaıy oqıǵalarǵa negizdelgen. Árıne basty nazarda – 2020 jyldyń eń tanymal sózine aınalǵan «COVID-19» qubylysy. Teatr ártisteri bul qoıylym arqyly ómirdiń basty qundylyqtaryn, karantın kezindegi adamdardyń ishki oı-tolǵanysyn, pandemııada adamzattyń basyna túsken qıyndyqtardy jetkizýge tyrysty.
«Álem bolyp kúresip jatqan koronavırýs dertiniń adamzat ómirine alyp kelgen ózgerisi barshamyzǵa aıtpaı-aq túsinikti. Vırýstyń taraý saldarynan qanshama adam ómirden ozdy. Aýrýdan qorǵaný maqsatynda buryn bolmaǵan karantındik shekteýler engizildi, sondaı-aq vaksına alý da mańyzdy bolyp otyr. «COVID-19» qoıylymyn ótken jyldyń tamyz aıynda qolǵa alyp, bıyl aqpan aıynda teatrymyzda alǵash ret kópshilikke usyndyq. Qoıylymnyń mán-mazmuny men tarıhy tikeleı ómirden alynǵan jáne bul – bizdiń ujymnyń debıýttik shyǵarylymy. Búgingi qatysýshylar ártister ǵana emes, sonymen qatar osy qoıylymnyń avtorlary bolyp sanalady. Taǵy bir aıtyp ótetin jaıt, búgin biz qoıylymnyń úzindisin (15-20 mınýt) ǵana usynyp otyrmyz, al tolyqtaı kórermen teatrymyzdan kelip kóre alady», dedi teatrdyń kórkemdik jetekshisi Eslám Nurtazın.
Esterińizge sala keteıik, elimizde alǵash bolyp pandemııa taqyrybyn kótergen qoıylymnyń rejısser-horeografy – Astana Musical teatrynyń ártisi Ánel Myrzaǵulova, al qoıylym mýzykasyn teatr ártisi Aqjol О́mirzaqov jazǵan.
Is-shara qalalyq ákimdiktiń qoldaýymen barlyq sanıtarlyq normalardy saqtaı otyryp ótti. Qoıylymǵa qatysqan barlyq ánshi PTR-testten ótken.
Áleýmettik mańyzǵa ıe shyǵarmashylyq qoıylymnyń tolyq nusqasyn astanalyqtar 21-22 mamyr kúnderi Qazagstan ortalyq konsert zalynda tamashalaı alady.
