О́zbekstan, Qyrǵyzstan, Tájikstan jáne Qazaqstannyń barlyq óńirinen kelgen balýandardyń basyn qosqan jarys belgili qoǵam qaıratkeri, bilikti basshy, atymtaı jomart Beket Mahmutovty eske túsirýge arnaldy.
Jas kezinde sambomen shuǵyldanyp, sport sheberi dárejesine deıin jetken Beket Sapabekuly Keńes Odaǵy tusynda túrli salada basshylyq qyzmetter atqardy. Zamannyń aýmaly-tókpeli kezeńinde bızneske bet burdy. 1993 jyly Qazaqstan boks federasııasynyń tizginin ustasa, 1998 jyly AIBA-nyń vıse-prezıdenti bolyp saılandy. Sol kezderi sporttyń osy túri boıynsha jerlesterimiz tolaǵaı tabystarǵa qol jetkizdi. Olımpııa oıyndary men álem chempıonattaryndaǵy jeńip alǵan túrli-tústi medaldardan bólek, ǵalamdyq dodanyń eń úzdik bylǵary qolǵap sheberine tıesili Vel Barker kýbogyn bizdiń jigitterge bir emes, birneshe márte buıyrǵany da esimizde. 2009-2012 jyldar aralyǵynda Mahmutov myrza respýblıkalyq dzıýdo federasııasynyń prezıdenti, kóp uzamaı Azııa konfederasııasynyń vıse-prezıdenti qyzmetterin atqardy. Dál sol tusta kúrestiń bul túrinde bıik belesterdi baǵyndyrdyq. Bir sózben aıtsaq, aıtýly azamattyń Qazaqstan sportynyń órkendeýine sińirgen eńbegi orasan zor. Beket aǵamyz byltyrǵy jyldyń 14 sáýirinde 81 jasqa qaraǵan shaǵynda dúnıeden ozdy.
Beket Mahmutovty eske alýǵa arnalǵan dástúrli týrnırdi tamashalaý arqyly elimizde asa daryndy dzıýdoshylardyń qalyń shoǵyry ósip kele jatqanyn ańǵardyq. Bul áńgime uldarǵa qatysty. Máselen, jastar arasyndaǵy jarysta óz salmaq dárejesi boıynsha top jarǵan Sherzod Davlatov (60 kılo), Serikbol Estaı (73 kılo), Aıan Baıǵazy (81 kılo) jáne Ermahan Ánýarbekov (90 kılo) syndy saıypqyrandardy qalaı maqtasaq ta jarasady. Olardyń boıynan jeńiske degen erekshe qulshynysty baıqadyq. Barlyǵy da ózderiniń ójettigi men tabandylyǵy jáne tehnıkalyq arsenaldarynyń moldyǵymen oqshaýlandy. Sonymen qatar ár beldesý barysynda olar dáp bir saqa sportshylar sekildi óte saýatty taktıka ustanyp, qarsylastaryn alyp ta, shalyp ta jyqty. Osyndaı kórinisterdi kórip, kóńilimiz kádimgideı marqaıyp qaldy. Al qalǵan úsh salmaqta О́zbekstannyń órenderi bas júldeni oljalady.
О́kinishke qaraı, kóńilge kirbiń túsirgen jaıttar da joq emes. Qazirgi kezde elimizde áıelder dzıýdosy aqsap turǵany barshaǵa málim. Sol sekildi qyzdardyń da jaǵdaıy máz emes eken. Máselen, jeti salmaq dárejesi boıynsha ótken básekelerdiń tek úsheýinde qazaq balýandarynyń baǵy jandy. Jeńis tuǵyrynyń eń bıik satysyna kóterilý baqyty Móldir Beısenova (57 kılo), Roza Nusantaıqyzy (70 kılo) jáne Ásel Bısenbaı (70 kılo) syndy boıjetkenderge ǵana buıyrdy. Sonymen qatar ózbektiń úsh arýy jáne qyrǵyzdyń bir qyzy altynnan alqa taǵyndy.
Jasóspirimder arasyndaǵy saıysta da dál sondaı kórinistiń kýási boldyq. Bizdiń uldar segiz salmaqtyń altaýynda aldyna jan salmady. Atap aıtsaq, Sanjar Álı (50 kılo), Talǵat Orynbasar (55 kılo), Aıan Baıkenjeev (60 kılo), Akbar Altaı (66 kılo), Nurjan Bısenov (81 kılo) jáne Damır Ahet (+90 kılo) Almaty tatamıinde qarsylas shaq keltirmedi. Bas júldeniń ekeýi Qyrǵyzstan men О́zbekstanǵa ketti. Al qyzdarymyzdyń óneri kóńilimizden shyqpady. Jerlesterimizdiń arasynan tek Sabına Iýldashbekova (40 kılo) men Arýjan Erejepovanyń (52 kılo) altyn tuǵyrǵa kóterilýge kúsh-jigeri jetti. Taǵy bir salmaqta Qyrǵyzstannyń ókili jeńis toıyn toılasa, bas júldeniń beseýi О́zbekstannan kelgen burymdylarǵa buıyrdy.
