Iri qurylys kezinde 6 mlrd teńgege jýyq qarajatty jymqyrdy degen aıyp 7 adamǵa taǵylǵan bolatyn. Olardyń qatarynda: Jolaýshylar kóligi jáne avtokólik joldary basqarmasynyń burynǵy bastyǵy Rashıd Amanjolov, burynǵy depýtat ári máslıhat hatshysy Janat Nurpeıisov, Astana Innovations AQ-tyń burynǵy basshysy Talǵat Áshim, sonymen qatar ártúrli kásiporyndardyń qyzmetkerleri Ulyqbek Achılov, Tımýr Qasabaev, Dýlat Músenov pen Dáýren Abdyhamıtov bar. Endi osy jeteý 11 jylǵa deıin sottalýy múmkin.
Tarqatyp aıtqanda, prokýror
Dıas Iаngalyshov aıyptalýshy Rashıd Amanjolovty 11 jylǵa bas bostandyǵynan aıyrýdy usynyp, Janat Nurpeıisovti múlkin tárkilep, memlekettik qyzmette, jergilikti ózin ózi basqarý organdarynda, Ulttyq bank pen onyń vedomstvolarynda, kvazımemlekettik uıymdarda 5 jyl merzimge deıin laýazymdardy atqarýǵa tyıym salyp, 9 jylǵa bas bostandyǵynan aıyrýdy suraǵan. Sonymen qatar Nur-Sultan qalasy máslıhatynyń burynǵy depýtatyn «Qurmet» ordeninen aıyrý usynyldy. Quzyrly organ ókili Astana Innovations basqarmasynyń burynǵy tóraǵasy Talǵat Áshimge de 11 jyl surady.
Basqa sottalýshylar – Ulyqbek Achılovtiń múlkin tárkilep, ony ortasha qaýipsizdik kolonııasynda 11 jylǵa deıin bas bostandyǵynan aıyrýdy, Tımýr Qasabaevty ortasha qaýipsizdik kolonııasynda 8 jyl bas bostandyǵynan aıyrýdy, Dýlat Musenovti jeke múlkin tárkilep, ortasha qaýipsizdik kolonııasynda 7 jylǵa, Dáýren Ábdihamıtovti de múlkin tárkilep, ortasha qaýipsizdik kolonııasynda 11 jylǵa deıin bas bostandyǵynan aıyrýdy surady.
Prokýror sot otyrysy kezinde R.Amanjolov pen J.Nurpeıisovtiń bul qylmysta erekshe rólge ıe ekenin aıtty. Aıta keteıik, aıyp taǵylǵan 7 adamnan bólek taǵy eki kúdiktige «Interpol» jelisi boıynsha halyqaralyq izdeý jarııalanǵan bolatyn. Olar Astana LRT kompanııasynyń burynǵy basshysy Talǵat Ardan jáne elorda ákiminiń burynǵy orynbasary Qanat Sultanbekov.
Prokýror Dıas Iаngalyshovtyń málimdeýinshe, Qylmystyq kodekstiń 52-baby 2-bóliginiń talaptaryna sáıkes, qylmys jasaǵan adamǵa ony túzeý, jańa qylmystardyń aldyn alý úshin qajetti jáne jetkilikti jaza taǵaıyndalýǵa tıis. «Qylmystyq kodekstiń osy babynyń úshinshi bóligine sáıkes jaza taǵaıyndaý kezinde qylmystyń sıpaty men qoǵamdyq qaýiptilik dárejesi, kináliniń jeke basy, onyń ishinde qylmys jasaǵanǵa deıingi jáne odan keıingi minez-qulqy, jaýapkershilik pen jazany jeńildetetin jáne aýyrlatatyn mán-jaılar, sondaı-aq taǵaıyndalǵan jazanyń sottalǵan adamdy túzeýge, onyń otbasynyń jáne onyń asyraýyndaǵy adamdardyń ómir súrý jaǵdaılaryna áseri eskeriletin bolady», dedi ol.
Sondaı-aq prokýror «Astana LRT» JShS-niń 5 mlrd teńge kólemindegi múliktik zııandy óteýge qatysty azamattyq talapty úlestik tártippen qanaǵattandyrýdy, sondaı-aq sottalýshylardan 4 mıllıon teńge kólemindegi prosestik shyǵyndardy óndirip alýdy surady.
Esterińizde bolsa, ótken jyldyń qazan aıynda bastalǵan Astana LRT isi boıynsha jeti sottalýshyǵa jeńil relsti trassany salý kezinde 5,7 mlrd teńgeni urlady degen aıyp taǵylǵan edi. Al 8 epızodtan turatyn qylmystyq is 155 tomǵa jetken.
