«2020 jyly shomylý maýsymynda Nur-Sultan qalasyndaǵy sý aıdyndarynda 5 adam qaıtys boldy. Sońǵy úsh jyldyń statıstıkasyna súıensek, 31 adam sýǵa ketken, onyń 10-y bala. Osy kezeńde qutqarýshylar qalanyń sý aıdyndarynda 41 adamdy, onyń ishinde 9 balany qutqardy. Júrgizilgen taldaý boıynsha, sýǵa ketýdiń basty sebebi – qaýipsizdik erejelerin saqtamaý bolyp otyr», deıdi Nur-Sultan qalalyq Tótenshe jaǵdaılar departamenti basshysynyń orynbasary Esen Baıyrov.
Onyń aıtýynsha, elordada jyl saıyn ruqsat etilmegen shomylý oryndarynyń sany ulǵaıýda.
«2018 jyly sýǵa shomylýǵa tyıym salynǵan 12 oryn bolsa, 2019 jyly 18 oryn, 2020 jyly 20 orynǵa jetip otyr. Mamyr aıynan bastap qala aýmaǵynda qala ákimdigimen birlesip 60 tyıym salý belgisi jáne 60 aqparattyq stend ornatyldy. Demalys aımaqtary men qalalyq jaǵajaılardyń ıelerine aqparattyq hattar tapsyryldy. Esil ózenine sýǵa shomylýǵa tyıym salynatyn 90 belgi, 30 aqparattyq stend ornatý josparlanyp otyr. Sondaı-aq departament qyzmetkerleri elorda turǵyndary men qonaqtaryna qaýipsizdik erejeleri týraly aldyn alý jumystaryn júrgizýde. Sýda shomylý maýsymy jyl saıyn 1 maýsymnan bastalady. Azamattar arnaıy jabdyqtalǵan oryndarda, jaǵajaılarda, basseınderde jáne qutqarýshylary bar ýchaskelerde shomylýy kerek», deıdi Baıyrov.
