Bıyl 32 márte jalaýy jelbiregen aıtýly jarysta Qazaq Ulttyq agrarlyq ýnıversıteti (QazUAÝ) negizinde qurylǵan «Almaty» klýby da baq synady. Quramynda Igor Chekrýskov, Baqytjan Baıtóre, Vladımır Bannıkov, Rýstam Másimov, Shohrat Arzıev jáne Amra Shalbarbaev syndy saqa oıynshylary bar qazaqstandyq komanda sheberliktiń shynaıy úlgisin kórsetti. Úsh kúnge sozylǵan básekeler barysynda Reseıdiń Zelenograd, Balashıha, Sankt-Peterbýrg, Solnechnogorsk qalalary jáne Kalýga oblysy men kil myqtylardyń jasaqtalǵan «Monolıt» klýbyn qapy qaldyrǵan jerlesterimiz bas júldeni jeńip aldy. Jarys qorytyndysy boıynsha almatylyq Vladımır Bannıkov eń úzdik voleıbolshyǵa tıesili arnaıy syılyqty ıelendi.
– Qazaq Ulttyq agrarlyq ýnıversıtetinde ardager voleıbolshylar komandasynyń qurylǵanyna 20 jylǵa jýyqtap qaldy. Sol kezden beri túrli dodalarǵa úzdiksiz qatysyp kelemiz. Maqatanǵanym emes, elishilik jarystarda bizdiń jeńilgen kezderimiz sırek. Máselen, sońǵy bes-alty jyl aralyǵynda kil myqtylar jınalǵan respýblıkalyq deńgeıde ótken týrnırlerdi tegisteı uttyq. Byltyr kúzde Anapada uıymdastyrylǵan Reseıdiń ashyq kýbogynda 16 komanda arasynan besinshi orynǵa taban tiredik. Bıyl Polshada jalaýy jelbiregen halyqaralyq týrnırde kúmis medaldi moınymyzǵa ildik. Sóz oraıy kelgende, QazUAÝ rektory Tilektes Esbolov myrzaǵa zor rızashylyǵymyzdy bildirsek deımiz. Kórnekti ǵalym tek ǵylym men bilimniń damýyna kóńil bólip qana qoımaı, sport salasynda barynsha damytýda. Sondaı qamqorlyqtyń arqasynda aıtýly ýnıversıtettiń voleıbolshylary dúbirli dodalarda aýyz toltyryp aıtarlyqtaı tabystarǵa qol jetkizip júr. Tilektes Isabaıulynyń ózi de jıi-jıi oıyn alańyna shyǵyp, túrli jarystarǵa qatysýda. Sonymen qatar komandamyzdyń sapynda áıgili aqyn, qoǵam jáne saıası qaıratker, Qazaqstannyń Eńbek Eri Oljas Súleımenov te óner kórsetedi. Bul kúnderi Oljas Omaruly 85 jasqa tolyp otyr. Soǵan qaramastan abyz aqsaqal áli de babynda. Mine, osyndaı serkelerdiń barynda bizdiń komandamyzdyń jeńilýge qaqymyz joq, – deıdi QazUAÝ rektorynyń keńesishisi, komanda kapıtany Igor Chekrýskov.
Osy komanda sapyndaǵy taǵy bir oıynshyǵa erekshe toqtalyp ótsek, esh aıyby joq dep oılaımyz. Ol – Baqytjan Baıtóre. Boıy 2 metrden asatyn qandasymyzdyń kezinde ataǵy alysqa jaıylǵanyn jankúıerler umyta qoımaǵan bolar. Baıtóre Almatynyń «Azamatymen» birge Azııanyń klýbtyq chempıonatynda bas júldeni oljalasa, Qazaqstannyń ulttyq quramasy sapynda Azııa birinshiliginiń kúmis medalin ıelendi. 1993 jyly qazaqtyń serke uly sary qurlyqtyń eń úzdik voleıbolshysy dep tanyldy. Odan keıingi jyldary Baqytjan Fransııanyń PÝK, PSJ, «Bordo» jáne Reseıdiń «Samotlor» men «Avtomobılıst» syndy beldi klýbtary sapynda jasyndaı jarqyrady.
