Baspasóz konferensııasynda aýdan ákimi Seıilbek Ysqaqov, aýdan prokýrory Rýslan Muratbekov, mekeme dırektory Sholpan Maqasheva oqıǵa týraly resmı aqparat berdi.
– Dáriger-psıhıatrdyń qyraǵylyǵy men beınebaqylaý kameralarynyń nátıjesinde bolǵan oqıǵaǵa jedel monıtorıng jáne beınetirkeý júrgizildi. Qatygez is-áreket deregi boıynsha birden quqyq qorǵaý organdaryna, prokýratýraǵa, aýdan-
dyq ákimdikke habarlanyp, Jumyspen qamtý jáne áleýmettik baǵdarlamalardy úılestirý basqarmasyna baıandaldy. Beınejazbalar quqyq qorǵaý organdaryna berildi. Men qyzmet alýshynyń qamqorshysy bolǵandyqtan, qatygezdik faktisi boıynsha aryz jazdym, – dedi ortalyq dırektory Sh.Maqasheva.
Aıagóz aýdandyq polısııa bólimi jedel-tergeý tobynyń qyzmetkerleri zardap shegýshiniń beti men moıyn tusynda syzattar baryn anyqtady. Atalǵan fakti boıynsha Qylmystyq kodekstiń 140-babynyń 2-bóligimen (kámeletke tolmaǵan balany tárbıeleý jónindegi mindetterdi oryndamaý) qozǵalǵan qylmystyq is tirkeldi. Zańnamaǵa sáıkes sotqa deıingi tergep-tekserý derekteri jarııa etilmeıdi. Qazirgi ýaqytta bultartpaý máselesi sheshilýde. Sot-medısınalyq saraptama taǵaıyndaý josparlanýda.
Baspasóz konferensııasynda spıkerler atap ótkendeı, byltyr mekemede oblys prokýrorynyń bastamasymen tárbıelenýshilerdiń qaýipsizdigin qamtamasyz etý maqsatynda beınebaqylaý kameralary ornatylǵan bolatyn. Esterińizde bolsa, byltyr Aıagóz aýdanyndaǵy arnaýly áleýmettik qyzmet kórsetý ortalyǵyndaǵy tórt balanyń aýyr dene jaraqatyn alý deregi boıynsha qylmystyq is qozǵalǵan edi. Tárbıelenýshilerdiń ólimine qatysty tergeý barysynda eki komıssııalyq sot-medısınalyq saraptamasy júrgizilip, balalar týa bitken aýrý saldarynan qaıtys boldy degen qorytyndy jasalǵan-dy. Alaıda máıitterdi tekserý kezinde úsh balanyń denesinen jaraqattar anyqtalǵan. Endi mine, jyl ótpeı jatyp, 15 jastaǵy balany urý deregi tirkelip otyr. Aıta keteıik, is – oblys prokýrorynyń erekshe baqylaýynda.
