COVID-19 pandemııasymen jáne onyń zardaptarymen kúres qosymsha qarjylandyrylatyn bolady.
Atap aıtqanda, dárilik zattardyń, medısınalyq maqsattaǵy buıymdardyń qajetti rezervi qamtamasyz etilýi, sondaı-aq emdeýmekemeleriniń medısınalyq jabdyqtarmen jaraqtandyrylý deńgeıi arta túsýi tıis.
Infraqurylymdyq jobalarǵa, onyń ishinde 3 500-den astam aýyldy jańǵyrtýǵa, joldardy salý men jóndeýge, qazaqstandyqtardy taza aýyz sýmen qamtamasyz etýge, azamattardyń turǵyn úı jaǵdaılaryn jaqsartýǵa qosymsha qarjy jiberiletin bolady.
«Aýyl – el besigi» jobasyn iske asyrý úshin bólingen qarajat kóbeıtilip, 106 mıllıard teńgege jetti. Osy qarjynyń esebinen myńdaǵan jumys ornyn ashý kózdelip otyr, bir myńnan astam áleýmettik jáne ınjenerlik ınfraqurylym nysandaryn salý jáne jóndeý jumystary júrgiziledi. Jumyspen qamtýdyń jol kartasyn qosymsha qarjylandyrý arqyly 127 ınfraqurylymdyq joba iske asyrylady. Sondaı-aq, 5 myńnan astam bıznes-jobaǵa nesıe berilip, sonyń nátıjesinde 15 myńǵa jýyq jumys orny ashylady. Naqtylanǵan bıýdjet elimizdiń ekonomıkalyq damýyna jáne halyqtyń áleýmettik jaǵdaıyn jaqsartýǵa oń áserin tıgizedi dep senemiz», dedi Máýlen Áshimbaev.
