Búginde eldiń bolashaǵyna qater tóndiretin jáne jastardyń tolyqqandy damýy, árbir tulǵanyń qalyptasýynda saldary tereń quqyq buzýshylyq kún tártibinen túspeı tur. Osy oraıda balalardy otbasylyq-turmystyq jáne seksýaldyq zorlyq-zombylyqtan qorǵaý, qazirgi zamannyń shyndyǵyna sáıkes kámeletke tolmaǵandardyń qaýipsizdigi men quqyqtaryn qorǵaýdy qamtamasyz etý tetikterin jetildirýdi maqsat etken jıynda sala mamandary derektermen bólisip, túıtkildi máselelerdi sheshýdiń joldaryn talqylady.
Konferensııany Ishki ister mınıstri, polısııa general-leıtenanty E.Turǵymbaev ashty. Ol óz sózinde kámeletke tolmaǵandarǵa qatysty quqyq buzýshylyqtardyń aldyn alýǵa baılanysty ózekti máselelerge, sondaı-aq olardy sheshýdegi IIM qyzmetiniń negizgi baǵyttaryna nazar aýdardy. Qazaqstan Respýblıkasy Prezıdentiniń kómekshisi – Qaýipsizdik Keńesiniń hatshysy Á.Isekeshev konferensııa qatysýshylaryna arnap quttyqtaý sóz sóıledi.
Alqaly jıyndy «Talap» qoldanbaly zertteýler ortalyǵynyń dırektory Rahym Oshaqbaev pen IIM Almaty akademııasynyń bastyǵy Aıdar Saıtbekov júrgizdi.
Kámeletke tolmaǵandarǵa qatysty quqyq buzýshylyqtar úshin jaýapkershilikti retteıtin zańnamany jetildirýmen qatar balalardy qorǵaýdaǵy vedomstvoaralyq tásil, kámeletke tolmaǵandardy ekstremıstik uıymdarǵa tartýǵa qarsy is-qımyl, balalarǵa qatysty zorlyq-zombylyqty joıý strategııalary, ómirlik daǵdarystyq jaǵdaıǵa tap bolǵan kámeletke tolmaǵandarǵa psıhologııalyq kómek kórsetý erekshelikterine qatysty mańyzdy máselelerge oraı qatysýshylar ortaǵa oı tastady.
Parlament Senatynyń depýtaty D.Nurjigit, Parlament Májilisiniń Áleýmettik-mádenı damý komıtetiniń múshesi D.Zakıeva, Bala quqyqtary jónindegi ýákil A. Saın, Adam quqyqtary jónindegi Ýákil E. Ázimova, BǴM vıse-mınıstri B.Asylova, IIM Ákimshilik polısııa komıtetiniń tóraǵasy M.Baımuqashev sóz sóılep, derektermen bólisti. Sonymen qatar jıynǵa Bas prokýratýranyń, Qazaqstan zańgerler odaǵynyń, IýNISEF, kámeletke tolmaǵandar isteri jónindegi mamandandyrylǵan sottyń, Almaty qalasy ákimdiginiń ókilderi, elimizdiń jetekshi ǵalymdary jáne Reseı IIM basqarý akademııasy jáne Túrkııa polısııa akademııasy, Reseı IIM Shyǵys Sibir ınstıtýtynyń belsendi ókilderi, IIM barlyq aýmaqtyq polısııa jáne qylmystyq-atqarý júıesi departamentteriniń basshylary da qatysty.
