Jıyn Nur-Sultan qalasynyń ýaqytymen saǵat 15:00-de «Habar24» telearnasy men QR Prezıdenti Baspasóz qyzmetiniń Facebook áleýmettik jelisindegi paraqshasynan tikeleı efırde kórsetiledi.
Otyrysta Joǵary eýrazııalyq ekonomıkalyq keńestiń Qurmetti tóraǵasy, Qazaqstannyń Tuńǵysh Prezıdenti – Elbasy Nursultan Nazarbaev, Reseı Federasııasynyń Prezıdenti Vladımır Pýtın, Belarýs Respýblıkasynyń Prezıdenti Aleksandr Lýkashenko, Qyrǵyz Respýblıkasynyń Prezıdenti Sadyr Japarov, Armenııa Respýblıkasy Premer-Mınıstriniń mindetin atqarýshy Nıkol Pashınıan, Eýrazııalyq ekonomıkalyq komıssııa alqasynyń tóraǵasy Mıhaıl Mıasnıkovıch sóz sóıleıdi. Sondaı-aq Kýba Respýblıkasynyń Prezıdenti Mıgel Dıas-Kanel jáne О́zbekstan Respýblıkasynyń Prezıdenti Shavkat Mırzııoev Joǵary eýrazııalyq ekonomıkalyq keńes janyndaǵy baqylaýshy-memleket basshylary retinde qatysady. Eske salsaq, 21 mamyrda QR Prezıdentiniń tóraǵalyǵymen Joǵary eýrazııalyq ekonomıkalyq keńestiń otyrysy ótetini týraly buǵan deıin habarladyq. Sonymen qatar, QR Prezıdentiniń janyndaǵy Qazaqstan strategııalyq zertteýler ınstıtýty qazaqstandyqtardyń EAEO jáne elimizdiń osy uıymdaǵy róline qatysty ne biletindigi týraly saýalnama júrgizdi.
