2020 jylǵy atqarylǵan jumys qorytyndylanyp, orta merzimdi perspektıvadaǵy mindetter qaraldy. Sondaı-aq koronavırýs pandemııasy jaǵdaıyndaǵy ózara ıntegrasııalyq is-áreket týraly pikir almasyldy. Joǵary Eýrazııalyq ekonomıkalyq keńestiń Qurmetti tóraǵasy birlesip jumys isteý arqyly Eýrazııa ekonomıkalyq odaǵy álemdik ekonomıkada óz ornyn tapqanyn aıtty.
– Koronavırýs pandemııasynan týyndaǵan ekonomıkalyq daǵdarys bizdiń ıntegrasııalyq birlestigimiz úshin úlken synaq boldy. Qaýipsizdik máseleleri aldyńǵy qatarǵa shyqty, – dedi Elbasy. Nursultan Nazarbaev jıynda azyq-túlik qaýipsizdigin qamtamasyz etý men áleýmettik ınfraqurylymdy damytý máselelerin kóterip, álemdik «jasyl» ekonomıkanyń damý úrdisterine toqtaldy.
Sonymen qatar Eýrazııa ekonomıkalyq odaǵynyń basqa ıntegrasııalyq birlestiktermen, uıymdarmen ózara tıimdi yntymaqtastyǵy jáne júıeli ekonomıkalyq dıalogty jalǵastyrýy mańyzdy ekenin atap ótti.
– Senimdi seriktestermen jáne odaqtastarmen birlesip qana elderimizdiń ekonomıkalyq qaýipsizdigi men táýelsizdigin qamtamasyz etýge bolady. Eýrazııa ekonomıkalyq odaǵy qurylǵannan beri uıym músheleri eń kúrdeli jaǵdaıda da ózara mámilege kelip, bir-birin qoldaıtyn seriktester ekenin kórsetti. Qazirgi jaǵdaıǵa baılanysty biz ıntegrasııa men ózara túsinistikti budan da arttyra túsýimiz kerek, – dedi Joǵary Eýrazııalyq ekonomıkalyq keńestiń Qurmetti tóraǵasy.
