40 jyldyq tarıhy bar sport alańy uzaq ýaqyt boıy jumys istemeı turǵan. Sebebi velojoldar eskirip, sportshylardyń jattyǵýyna yńǵaısyzdyq týdyrǵan. Sol sebepti Federasııa qaıta jóndep, osy kúzde qoldanysqa beredi.
1,17 gektar aýmaqty alyp jatqan velotrektiń joldary tolyqtaı jańartylyp, ortasynda zamanaýı BMX-saıabaǵy salynady. Jóndeý jumystary tolyqtaı aıaqtalǵan soń bir ýaqytta 60-80 jýyq kásibı sportshy úsh alańda jattyǵa alady. Aıta keteıik munda kásibı sportshylardan bólek qarapaıym qala turǵyndary da sportpen shuǵyldansa bolady.
«Biz, ásirese, balalar sporty men buqaralyq sportqa basymdyq berip otyrmyz. Jasóspirimderimiz kóshede júrmeı, oıyn alańdarynda ýaqyt ótkizse degen nıetimiz bar. Olardyń arasynda daryndy balalar bolýy múmkin, olarǵa barlyq jaǵdaıdy jasap, talanttarynyń ashylýyna múmkindik jasaǵymyz keledi», deıdi Qazaqstannyń velosıped sporty federasııasynyń basshysy Nurlan Smaǵulov.
Jóndeý jumystarynyń barysymen Mádenıet jáne sport vıse-mınıstri Erlan Qojaǵapanov tanysyp, jas sportshylarmen kezdesti. Mádenıet jáne sport vıse-mınıstri velosporttyń mańyzyna toqtalyp, bul kóp medal jeńýge múmkindik beretin, sondyqtan ony damytý arqyly elimizdiń ımıdji qalyptasatyndyǵyn atap ótti.
«Velotrek álemdik standarttarǵa saı jóndeledi dep josparlanǵan, osylaısha munda tek jattyǵyp qana qoımaı, halyqaralyq jarystar ótkize alamyz. Degenmen, eń bastysy balalarymyzdyń, kishkentaı sportshylarymyzdyń tolyqqandy sportpen shuǵyldanýyna múmkindik jasaý úshin jasylyp jatqan dúnıe», deıdi Erlan Qojaǵapanov.
Esterińizge sala keteıik, Qazaqstannyń velosıped sporty federasııasy buqaralyq jáne balalar sportyn damytý baǵdarlamasy aıasynda elimizdiń barlyq aımaqtarynda 13 saıabaq salýdy josparlap otyr. Búgingi tańda Almaty qalasyndaǵy «Halyq Arena» kesheniniń aýmaǵynda BMX-saıabaǵynyń qurylysy bastaldy.
