Osy álemdik dodadan keıin Halyqaralyq dzıýdo qaýymdastyǵy dzıýdoshylarǵa tıisti upaılaryn taratyp, álemdik reıtıng arqyly Olımpıadaǵa joldama alǵan balýandardyń tizimin jarııalaıdy.
Dúnıejúzilik jarystyń qarsańynda dzıýdoshylarymyzdyń olımpıadalyq reıtıngindegi oryndary qandaı? Tórtjyldyqtyń basty dodasynda el namysyn qansha balýan qorǵaýy múmkin? Osy suraqtarǵa jaýap izdep kórsek.
Dzıýdodan erler quramasynyń bas bapkeri Ǵalymjan Jylgeldıev 60 kılo salmaq dárejesinde synǵa túsip júrgen Eldos Smetovtiń Olımpııa oıyndaryna baratynyn aıtqan bolatyn. Iá, Eldostyń dál qazirgi tańda Tokıoǵa baratynyna talas joq. Osy aptanyń basynda jańartylǵan Olımpıadalyq reıtıngte Eldos tórtinshi satyda da tur. Alǵashqy úshtikte eki japon balýany jáne bir reseılik balýan bar.
66 kılo salmaqta eki birdeı myqty balýanymyz bar. Biri – álem chempıonatynyń kúmis júldegeri Erlan Serikjanov, ekinshisi – kóptegen halyqaralyq jarysta top jaryp júrgen Eldos Jumahanov. Eki balýan da el namysyn qorǵaýǵa laıyq. Degenmen Olımpıadaǵa bir ǵana balýannyń baratynyn eskersek, bul jerde Erlan Serikjanovtyń shoqtyǵy bıik tur. Ol olımpıadalyq reıtıngte 3831 upaımen 13-orynda. Al Eldos Jumahanov 2787 upaımen 23-orynda. Alaıda bir qyzyǵy, álem chempıonatyna Eldos barady. Eger ol fınalǵa shyǵyp jatsa, Serikjanovtyń aldyna túsedi. О́ıtkeni kúmis júldegerge reıtıng boıynsha 1044 upaı, al chempıonǵa 2000 upaı beriledi.
Eldostyń Olımpıadaǵa barý-barmaýy óz qolynda.
73 kılodaǵy Jansaı Smaǵulov jyl basynda Olımpıadaǵa baratyn balýandardyń eń sońǵysy bolyp turǵan. Biraq Dohada (Qatar) ótken «Sheberler» básekesinde úzdik bestikke kirip, Tashkenttegi Gran Slam jarysynda kúmis júldege ıe bolǵan balýanymyz birden 12-orynǵa kóterildi. Degenmen sońǵy jarystarda Jansaıdyń joly bolmady. Qazir ol 16-orynda. Biraq bul – Olımpıadaǵa barýǵa jetkilikti oryn. Endi osy nátıjeden tómendemeýi qajet.
81 kıloda úmit artyp otyrǵan balýandarymyzdyń biri – Dıdar Hamza. 2018 jyly jazǵy Azııa oıyndarynyń chempıony bolǵan Dıdardyń, ókinishke qaraı, sońǵy kezderi joly bolmaı júr. Qazir ol Olımpıadaǵa baratyn balýandardyń arasynda joq. Osydan bir aı buryn qurlyqtyq kvota arqyly baratyndardyń tiziminde edi. Qazir odan da shyǵyp qalǵan – 32-oryn.
90 kılo salmaqta kúresetin Islam Bozbaevtyń da jaǵdaıy máz emes. Osydan birneshe aı buryn Olımpıadaǵa baratyn 18 balýannyń ishinde (16-oryn) edi. Qazir 24-orynda. Iаǵnı onda tek qurlyqtyq kvota ǵana bar. Álem chempıonaty – onyń sońǵy múmkindigi. Eger alǵashqy aınalymnan súrinetin bolsa, onda amalsyz Olımpıadany teledıdardan tamashalaıdy.
О́kinishke qaraı, 100 kılodaǵy balýandarymyzdyń baǵy janbaı qoıdy. El namysyn qorǵap júrgen Aıbek Serikbaev – 50-orynda. Vıktor Demıanenko 70-shi orynda tur. Bul eki balýan úshin Tokıonyń esigi tars jabylǵan. Sodan da bolar, álem chempıonatynda eki balýanymyz da kúrespeıdi.
100 kılodan joǵary salmaqtaǵy Erasyl Qajybaev Olımpıadalyq reıtıngte 35-orynda. Joldama alý úshin Erasylǵa biraz eńbektený kerek.
Qyzdar quramasynyń bapkerleri Olımpıada jáne álem chempıonatynyń qola júldegeri Otgonseseg Galbadrahqa senim artyp otyr. Qatysqan jarysynan kemi qola medal alyp qaıtatyn balýanymyz 3353 upaımen 14-orynda. Galbadrah bıyl eshbir jarysqa qatyspady.
Dese de, buǵan deıingi jınaǵan upaıynyń kóptiginiń arqasynda Olımpıadaǵa baratyn múmkindigin saqtap tur.
Qoryta kelgende, dál qazirgi tańda Qazaqstan quramasynda 5 salmaq dárejesi boıynsha
(4 erler, 1 qyzdar) joldama bar. Altynshy joldamany alamyz ba, beseýden tórteýge túsip qalamyz ba, ony álem chempıonatynan keıin biletin bolamyz.
