Almaty ákimdiginiń qaýlysy «Ashyq NQA» portalynda jarııalandy.
«Qaýlyǵa sáıkes, Almaty qalasy mádenıet basqarmasynyń «Almaty haıýanattar baǵy» kommýnaldyq memlekettik qazynalyq kásiporny jergilikti mańyzy bar erekshe qorǵalatyn tabıǵı aýmaqtarda kórsetetin qyzmetteri úshin tarıfter mólsheri bekitilsin», delingen qujatta.
Qazirgi tańda eresek kelýshilerge arnalǵan bılet quny 800 teńge. Al 7 men 12 jas aralyǵyndaǵy balalarǵa arnalǵan baǵa ózgerissiz qalady - 300 teńge.
Almaty qalasy mádenıet basqarmasynyń «Almaty haıýanattar baǵy» kommýnaldyq memlekettik qazynalyq kásiporny tıisti qujattardy usynǵan jaǵdaıda tómengi tulǵalarǵa qyzmetti tegin usynady:
- Uly Otan soǵysy qatysýshylary men múgedekterine;
- múgedekterge;
- densaýlyq jaǵdaıy boıynsha múgedekti ertip júretin adamǵa;
- zeınetkerlerge;
-«Altyn alqa», «Kúmis alqa» ıegeri bolyp tabylatyn nemese «Batyr ana» ataǵyn alǵan, I jáne II dárejeli «Ana dańqy» ordenimen marapattalǵan analarǵa;
- jeti jasqa deıingi balalarǵa;
- jetim balalarǵa jáne ata-ana qamqorynsyz qalǵan on segiz jasqa tolmaǵan balalarǵa;
- merzimdi qyzmettegi áskerı qyzmetkerlerge.
