Ádebıet • 27 Mamyr, 2021

Nottıng Hılldegi hıkaıa

68 ret kórsetildi

Londonnyń ortalyǵyndaǵy Vest-End dep atalatyn batys bóliginde Nottıng Hıll dep tanylǵan shaǵyn burysh bar. Azyq-túlik, jemis-jıdek taǵysyn taǵy kúndelikti turmysqa qajet usaq-túıek, kóneniń kózi sanalatyn antıkvarıat buıymdar deısiz be, áıteýir izdegen adam joǵyn tabatyn bazar qysy-jazy tynbastan jumys istep jatatyn. Osy bir qarbalastyń arasynda ómirdiń mánin túsine almaǵan kóńilsiz bir jan kitap satyp turar edi. Ol – Ýılıam Taker (Hıý Grant).

Dúńgirshekte negizinen jolaýshylar­­ǵa arnalǵan nusqaýlyqtar satylatyn­dyq­tan ba, munda kóp eshkim bas suǵa ber­meıdi. Ileý de bireý, onda da ishi pysqan álde­bir alaıaq bolýy ǵajap emes. Bir-biri­n aıyrǵysyz ish pystyrarlyq kún­derdiń birinde dúkenge Gollıvýdtyń áıgili juldyzy Anna Skott (Djýlııa Ro­berts) kelip kiredi. Qajetti kitabyn al­ǵan soń, keterinde shyn jaqsy kórgeni me, álde oınaǵany bolar qaradaı ábigerge túsken Ýılıamdy Anna súıip alady. Mundaıdy kútpegen qarapaıym dúken satýshysy, árıne eseńgirep qalary daýsyz, tipti senimdi serigi Spaıkpen keńesse de es-aqylyn jııa almaı dármeni qurıdy.

Fılmde Annanyń minez-qulqyn tú­siný óte ońaı. Qarapaıym adamı se­zimdi, jaqsy kórýdi, unatýdy, adam sııaq­ty renjýdi saǵynǵan jaı ǵana adam, jalǵyzsyraǵan qamkóńil qyz balasy edi. Shoý-bıznestiń álemish álemi ábden mezi qylǵanda kishkentaı dúkendegi qa­rapaıym jigitten jylylyq izdeýi de tabıǵı. Tipti esh kúmánsiz. Bir-birin unat­qanyn áli ózderi de anyq túsine qoımaǵan ekeý endi bastalǵan tanystyǵyn syrt kózden qansha jasyrǵanymen, osy mańaı­dyń bitpeıtin gý-gý áńgimesine arqaý bolady. Qashqan-pysqan baspasóz ókilderi qoldaryndaǵy bileýdeı mıkrofondaryn kes-kestep ataqty Gollıvýd juldyzy men qarapaıym bazardaǵy satýshy jigit­tiń arasynda ne baryn bile almaı álek. Sıýjettiń ishine búkken bar syryn oqyr­manǵa jaıyp salmas úshin satýshy men aktrısanyń arasyndaǵy sońǵy suhbatta kórermenge usynatyn erekshe jylylyq bar ekenin qosa ketkenim jón bolar.

Dese de fılm búgin túsirilgen týyn­dy emes, kórermenge jol tartqanyna jıyrma jyldan asqan eski fılm. Dál búgingideı álemdi qutqarýǵa attan­ǵan kóz­siz batyrlardyń shytyrman oqı­ǵasy, ıa tym zamanaýılanǵan áleýmet­tik ta­qyryptar áli trendke aınala qoı­ma­ǵan beıbit jyldardyń beıǵam sátteri qam­tylady. Mundaǵy brıtan ıýmory kún­delikti ómirdiń keı absýrd tusyn erekshe názik tabıǵatymen jymdastyra otyryp, elep-ekshep usynady. Jalpy, brıtan komedııalarynyń tez tanylýyna brıtan ıýmory birden-bir sebep bol­ǵany belgili ári el mádenıetin álemge áıgili etýdegi mańyzdy arna desek artyq aıtpaǵan bolar edik. Máselen, Nottıng Hılldiń jaıma bazaryndaǵy qaıtalana beretin birsaryndy kóńilsizdigi Takerdiń dostary men otbasy qatysqan sıýjet jelisimen únemi túrli túske boıalyp otyratyndaı. Dál osy toptyń kúshimen keıipkerlerdiń tapqyr komedııasy fılmniń áli kúnge deıin baǵyn asyryp keledi. Aqyl-esi kemdeý kórinetin, al shashy ómiri taralmaıtyn esalań jigittiń keıpindegi Spaıktyń (Rıs Ivans) poshymy bylaı qarasań kisi úrketindeı-aq.

– Birden aıtaıyn, myna ıogýrttyń dámi buzylǵan, – deıdi áldeneni qasyqtap qaýjańdap jatyp.

– Bul – maıonez.

– Onda jeýge keledi, – dep tańdaıyna jáne bir qasyq tastap qoıyp kete barady. Ańǵal Spaıktyń naǵyz bolmysy osy. Birinshi kózge túsetini sereıgen uzyn boıy men kókshil kózderi. Tip­ti bas keıipkerlerdiń jattandy is-áre­ketinen sıýjet jelisi áne-mine tuıyqqa tirelgendeı bolǵanda osy Spaık shyǵa kelip, sahnaǵa jańa dem beredi. Bolmasa, tańerteń uıqyly-oıaý qalpynda sýda júzetin qyp-qyzyl kostıýmdi ústine ilip alyp shyǵa keletin sáti she? Dosynyń mundaı jaýapsyzdyǵyna eti úırengen Ýılıam esh tańdanyssyz suraıdy:

– Muny nege kıip aldyń?

– Taza kıim qalmaǵan eken, bári jýyl­maǵan. Sodan seniń kıimderińdi aqtaryp jatyp, kózime osy bireýi tústi.

– Biraq bul sýda júzetin kostıým ǵoı, – deıdi shydaı almaı ketken Ýılıam.

– Iá, esesine kóńildi ǵoı, – deıdi Spaık esh saspastan orazasyn qalǵan-qutqan birdeńemen ashyp jatyp.

Qaıtalana beretin tirshilikten ma­ǵyna taba almaǵanda dál osy esalań sary jigitteı qolǵa túsken kıimdi ile sa­lyp, ózińdi de, ómirińdi de erkine qoıa ber­giń keletin sátter bolatyny ras. О́z­deri belgilegen ustanymdar men tártip aıasynan alysqa uzaı almaı, qamalǵan ekeýdiń jan dúnıesinde jatqan qulazýy, baz keshýi, qalaýy, erkindikti ańsaýy, qamyǵýy syndy ishki shekteýleri Spaık obrazy arqyly kórsetilgen be deısiń. Muny fılm rejısseri Rodjer Mıshell jaqsy ańǵarǵan.

Fılmdi túsirý úshin jumys toby aıanbaı ter tógýge májbúr boldy. Nottıng Hıll aımaǵyn dál metropolııanyń or­ta­syndaǵy neǵurlym romantıkalyq aýyl retinde kórsetý úshin eýropalyq kelbetin aıryqshalap, Karıb araldarynan aýyp, uzaq jyl qonystanǵan ımmıgranttardy kósheden ýaqytsha kóshire turýǵa májbúr bolǵan kórinedi. Nottıng Hılldiń keıipkerlerin biri balalarsha erikken bireýler dep jaratpaýy, endi biri brıtan ázilderiniń tym kóp ekenin aıtyp shaǵymdanýy múmkin. Bázbireýler bos áńgimege de balaýy ǵa­jap emes. Sondyqtan fılm jaıyn­da asyryp, ne asyǵys baılam jasaý­dan aýlaqpyz, qandaı da bir oı túıý kórer­menniń enshisindegi dúnıe. Baıaǵyda bireý «armandaýǵa bolmaı ma» depti degen qaǵytpa bar. Iá, kınofılmdegi oqıǵalardyń shynaıy ómirde bola qoıýy ekitalaı. Áıtse de osy ómirde kishkentaı ǵajaıyptarǵa sengisi keletin úlkender úshin osynaý qarbalas kúnderdiń arasynda boı jazyp, sál aıaldap tynystap alýǵa, bálkı az-maz armandaýǵa múmkindik beretin izgilik ertegisi syndy este qalady.

Sońǵy jańalyqtar

Nar Narymbetov edi...

Qazaqstan • Keshe

«Omıkron» shtamy oqshaýlaıdy

Koronavırýs • Keshe

Portrettegi parasat

Elbasy • Keshe

Almatyda 5G jelisi iske qosyldy

Tehnologııa • Keshe

Uqsas jańalyqtar