«30 mamyrda Bulandy aýdanynyń polısııa bólimine 25 jastaǵy Nur-Sultan qalasynyń turǵyny habarlasyp, «Nur-Sultan-Petropavl» tas jolynyń 138 shaqyrymynda jol apaty bolǵany týraly jetkizdi», delingen Aqmola oblysy polısııa departamentiniń baspasóz qyzmeti taratqan aqparatta.
Aldyn ala boljam boıynsha, Nur-Sultan baǵytynda kele jatqan Volkswagen Polo avtokóliginiń 30 jastaǵy júrgizýshisi rýlge ıe bola almaı, 25 jastaǵy jigit júrgizip kele jatqan Mercedes Benz júk kóligimen soqtyǵysqan. Volkswagen Polo aýdarylyp qaldy.
«Apat saldarynan Volkswagen Polo avtokóliginiń jolaýshylary oqıǵa ornynda qaıtys boldy. Kólikte 67 jastaǵy er adam men 56 jastaǵy áıel bolǵan. Ekeýi de astananyń turǵyndary», dep habarlady PD.
Sonymen qatar Volkswagen Polo kóliginiń 4 jasar jolaýshysy Aqkól aýdanynyń ortalyq aýrýhanasyna aýyr jaraqatpen jetkizilgen.
