Bıylǵy dop dodasynda Nur-Sultannyń «Astana», Qostanaıdyń «Tobyl» jáne Qaraǵandynyń «Shahter» klýbtary baq synaıdy. Olar týrnırdi irikteý saıystarynan bastaıdy. Bul komandalardyń árqaısysy kelesi kezeńge shyqqan saıyn 100 000 evrodan alyp otyrady. Eger alǵashqy synaqtan súringen jaǵdaıda ótemaqy retinde 150 000 evro tóleý jaǵy da qarastyrylǵan. Sol sekildi ekinshi kezeńde jeńilgenderge 350 000 jáne úshinshi raýndta utylǵandarǵa 550 000 evrodan beriledi. Pleı-off kezeńinde súringenderdiń esepshotyna birden 750 000 evro kóleminde qarajat aýdarylady. Al toptyq týrnırde kúsh synasý qurmetine ıe bolǵan komandalardyń materıaldyq jaǵdaılary edáýir jaqsara túsedi.
Esterińizge sala keteıik, bıylǵy jyly tusaýy kesilgeli otyrǵan Konferensııa lıgasynda 184 komanda óner kórsetedi. Solardyń arasynan iriktelip shyqqan 32 komanda toptyq týrnırde kúsh synasady. Odan keıin 1/8 fınal, shırek fınal, jartylaı fınal jáne fınaldyq saıystardy tamashalaımyz. Jarys jeńimpazy 2022 jyldyń 25 mamyrynda Tıranada anyqtalady.
