Osydan eki apta buryn ǵana Qazaq Ulttyq agrarlyq ýnıversıteti (QazUAÝ) negizinde qurylǵan aıtýly komanda Máskeýdiń dál irgesinde ornalasqan Zelenograd qalasynda KSRO-ǵa eńbek sińirgen jattyqtyrýshy Aleksandr Kılchevskııdi eske túsirýge arnalǵan týrnırde top jarǵany jaıynda jazǵan edik. Mine, endi olar taǵy da atoı saldy.
Neva jaǵalaýynda ótken jarysta «Almatynyń» sapynda Igor Chekrýskov, Baqytjan Baıtóre, Vladımır Bannıkov, Rýstam Másimov, Shohrat Arzıev, Aleksandr Tarasov, Vıacheslav Kozýb, Amra Shalbarbaev jáne Eldar Gazızýlın syndy oıynshylary óner kórsetti. Bastapqy básekelerdiń barlyǵyn óz paıdasyna sheshken jerlesterimiz aqtyq synda Kostroma oblysynyń ókilderimen kezdesti. Al bul komanda kezinde ardegerler Olımpıadasynda top jaryp, álem chempıony atanǵan. Osyndaı azýly qarsylastarynan esh qaımyqpaǵan qazaqstandyq voleıbolshylar 2:0 esebimen basym túsip, bas júldeni oljalady.
– Qazaq Ulttyq agrarlyq ýnıversıtetinde ardager voleıbolshylar komandasynyń qurylǵanyna 20 jylǵa jýyqtap qaldy. Sol kezden beri túrli dodalarǵa úzdiksiz qatysyp kelemiz. Maqatanǵanym emes, elishilik jarystarda bizdiń jeńilgen kezderimiz sırek. Máselen, sońǵy bes-alty jyl aralyǵynda kil myqtylar jınalǵan respýblıkalyq deńgeıde ótken týrnırlerdi tegisteı uttyq. Byltyr kúzde Anapada uıymdastyrylǵan Reseıdiń ashyq kýbogynda 16 komanda arasynan besinshi orynǵa taban tiredik. Bıyl Polshada jalaýy jelbiregen halyqaralyq týrnırde kúmis medaldi moınymyzǵa ildik. Taıaýda ǵana Máskeýdegi týrnırde top jardyq. Sóz oraıy kelgende, QazUAÝ rektory Tilektes Esbolov myrzaǵa zor rızashylyǵymyzdy bildirsek deımiz. Kórnekti ǵalym tek ǵylym men bilimniń damýyna kóńil bólip qana qoımaı, sport salasynda barynsha damytýda. Sondaı qamqorlyqtyń arqasynda aıtýly ýnıversıtettiń voleıbolshylary dúbirli dodalarda aýyz toltyryp aıtarlyqtaı tabystarǵa qol jetkizip júr. Tilektes Isabaıulynyń ózi de jıi-jıi oıyn alańyna shyǵyp, túrli jarystarǵa qatysýda. Sonymen qatar komandamyzdyń sapynda áıgili aqyn, qoǵam jáne saıası qaıratker, Qazaqstannyń Eńbek Eri Oljas Súleımenov te óner kórsetedi. Mine, osyndaı serkelerdiń barynda bizdiń komandamyzdyń jeńilýge qaqymyz joq, – deıdi QazUAÝ rektorynyń keńesishisi, komanda kapıtany Igor Chekrýskov.
Taǵy bir aıta keterlik jaıt, Sankt-Peterbýrgtegi týrnırdiń qorytyndysy boıynsha «Almaty» klýbynyń ókili Aleksandr Tarasov eń úzdik oıynshy dep tanyldy.
