Olar bosaný kezindegi asfıksııanyń aýyr túrlerine baılanysty jańa týǵan nárestelerdiń ólimin azaıtýǵa kómektesedi. Zamanaýı reanımasııalyq qural-jabdyqtardy satyp alýda Samruk-Kazyna Trust áleýmettik jobalardy damytý qory uıytqy boldy.
«Atalǵan joba aıasynda elektrensefalografııa monıtory men avtomatty basqarylatyn gıpotermııa apparaty, sondaı-aq naýqastyń monıtory satyp alyndy. Munyń bári sábıler ólimi deńgeıin tómendetýge, sondaı-aq jańa týǵan nárestelerde asfıksııaǵa ushyraý nátıjesinde múgedektiktiń aýyr túrleriniń damýynyń aldyn alýǵa baǵyttalǵan. Biz densaýlyq saqtaý salasynda birqatar jobany júzege asyrýdamyz, sonyń arqasynda jyl saıyn múgedektigi bar 7 myńnan astam bala zamanaýı ortalyqtarda tegin ońaltýdan óte alady, Qazaqstanda emdelmeıtin dıagnozy bar shamamen 100 bala sheteldik klınıkalarda emdeledi, 600-den astam «erekshe» bala beıimdelgen sportpen aınalysady, al 10,5 myń bala túzetý kabınetteri men ınklıýzıvti ortalyqtarda mamandardan kómek ala aldy», dep atap ótti qordyń resmı ókili Mıras Irgebaev.
Ol sondaı-aq qor Qaraǵandy oblysynda buqaralyq jáne beıimdelgen sport túrlerin damytý, otbasy ınstıtýtyn qoldaý, Covid-19 qarsy kúres aıasynda medısınalyq mekemelerdi jabdyqtarmen qamtamasyz etý sııaqty birqatar mańyzdy áleýmettik jobalardy iske asyratynyn atap ótti.
Jyl saıyn Qaraǵandy oblysynda 19 myń bala dúnıege keledi, onyń 7%-y – merziminen erte týǵandar. Olarǵa negizgi kómekti 6 perınataldyq ortalyq kórsetedi. Olardyń biri oblystyq klınıkalyq aýrýhana bazasynda jumys isteıdi jáne jyl saıyn 5000-ǵa jýyq bosanýdy qabyldaıdy. Byltyr munda orta jáne aýyr dárejeli asfıksııamen 100-ge jýyq sábı dúnıege keldi. Olardyń barlyǵy terapevtik gıpotermııa júrgizýdi qajet etti. Alaıda bul úshin aýrýhanada arnaıy qural-jabdyqtar bolmady, sondyqtan qolda bar quraldarmen jumys jasaýǵa týra keldi.
Terapııalyq gıpotermııany alǵashqy 6 saǵatta, tipti jańa týǵan náresteniń ómiriniń alǵashqy mınýttarynda qoldaný qajet. Sonda mı jasýshalarynyń jumysyn qalpyna keltirýge múmkindik bar. Eger mundaı apparat aýrýhanada bolmasa, bala ortalyq júıke júıesiniń aýyr fýnksıonaldyq zaqymdanýymen ómir súrýine týra keledi, keıde tipti qaıtys bolýy múmkin. Gıpotermııa apparaty jańa týǵan náresteniń barlyq denesin nemese onyń bóligin uqypty salqyndatady, osylaısha núkteli temperatýralyq áserler qan aǵynyn túzetýge jáne sol arqyly nárestelerdiń bas mıynyń jasýshalarynyń nemese zaqymdanǵan bólikteriniń qalpyna kelýin baqylaýǵa múmkindik beredi.
