Tóraǵa orynbasary áńgime barysynda Memleket basshysynyń bastamasy boıynsha elimizde iske asyp jatqan mańyzdy saıası jańarýlardy, onyń ishinde zańnamadaǵy saılaý týraly belgili ózgeristerdi óńirlik ókilge tanystyrdy. Sondaı-aq elimiz azamattarynyń usynystar engizý jónindegi onlaın-petısııalaryn zańnamalyq resimdeý bastamasyna, sondaı-aq azaptaýlarǵa qarsy kúres, adam saýdasy, balalardy kıberbýllıngten qorǵaý týraly zańnamany jetildirýge nazar aýdaryldy.
Asqar Shákirov prezıdenttik saıası reformalardyń úshinshi toptamasynda kózdelgen «Qazaqstan Respýblıkasyndaǵy Adam quqyqtary jónindegi ýákil týraly» zań jobasy týraly habardar etti.
«Qujatta Adam quqyqtary jónindegi ýákil mártebesine, saılaý tártibine jáne onyń qyzmetiniń prınsıpterine erekshe mán beriledi. Ýákildiń ókilettikteri edáýir keńeıtiledi, bul oǵan jalpyǵa tanylǵan halyqaralyq standarttarǵa, eń aldymen Parıj qaǵıdattaryna sáıkes memlekettiń saıası-quqyqtyq júıesinde tıisti oryn alýǵa múmkindik beredi.
Elimizdiń barlyq óńirlerinde Ombýdsmen ókilderin qurý kózdelgen. Zań jobasy halyqaralyq jáne quqyq qorǵaý salasyndaǵy úkimettik emes uıymdardyń qatysýymen Qazaqstan Respýblıkasyndaǵy Adam quqyqtary jónindegi ýákil janyndaǵy Sarapshylyq keńestiń otyrysynda tanystyryldy. Qujat jarııa talqylaý úshin Senattyń saıtyna ornalastyryldy», dedi Senat Tóraǵasynyń orynbasary.
Quqyq qorǵaý salasyndaǵy 2021-2022 jyldarǵa arnalǵan basym mindetteriniń qatarynda Qazaqstannyń BUU Bala quqyqtary týraly konvensııasyna habarlaý rásimine qatysty Fakýltatıvtik hattamaǵa jáne BUU Múgedekterdiń quqyqtary týraly konvensııasyna Fakýltatıvtik hattamaǵa qosylýy atap ótildi. Osy halyqaralyq qujattarǵa qosylý jónindegi tıisti jol kartalary ázirlendi.
AQJKB ókili Qazaqstanda bolyp jatqan ózgeristerdi joǵary baǵalady jáne ulttyq quqyq qorǵaý mekemesiniń qyzmetine qajetti kómek kórsetýge ázirligin bildirdi.
Kezdesý qorytyndysy boıynsha quqyq qorǵaý jobalary aıasynda ózara is-qımyldy nyǵaıtýǵa nıet bildirildi.
