Qazaqkonserttiń 60-shy mereıtoılyq maýsymynda ótken «Redeet oblakov letýchaıa grıada» atty konsert Elordadaǵy «Qazaqstan» ortalyq konsert zalynyń úlken sahnasynda ótti.
Konserttik baǵdarlamaǵa orys mýzykalyq romantızmi dáýirindegi vokaldyq mınıatıýralar qosyldy. Sondaı-aq bul keshte M.Balakırev, M.Mýsorgskıı, A.Borodın, N.Rımskıı-Korsakov, S.Kıýı syndy ataqty kompozıtorlardyń úzdik týyndylary shyrqaldy.
Atalǵan shyǵarmalardyń poetıkalyq negizin HIH ǵasyrdyń I jartysynda qalam tartqan orys aqyndarynyń óleńderi qurady. Romanstarmen jumys jasaı otyryp, kompozıtorlar mán-maǵynaǵa, poetıkalyq mátindi tańdaýǵa, ony júzege asyrýdyń ekspressıvti quraldaryna úlken talaptar qoıdy.
«Juldyzben bir sahnada» jobasynyń arqasynda kórermender ártisterge jaqyn bola túsip, erekshe shyǵarmashylyq prosesstiń qyr-syryn tereńirek sezine aldy. Oryndaýshy men tyńdaýshy arasyndaǵy dál osyndaı baılanys jańa konsertter men týyndylardyń paıda bolýyna shabyt berip, mádenı baılanysty arttyra túsedi.
Búgingi kesh – jańa jobamyzdyń alǵashqy konserti. Aldaǵy ýaqytta bul joba turaqty túrde ótkiziledi. «Qazaqstan» ortalyq konsert zalynyń bas sahnasy tolyqqandy kameralyq zaldyń fýnksııasyn atqardy. Zaldyń tamasha akýstıkasy osyndaı jańa tájirıbelerge jaqsy múmkindik berip otyr», dedi Qazaqkonserttiń kórkemdik jetekshisi Tımýr Ýrmancheev.
Konserttiń jańa formatymen erekshe úılesim tapqan «FORTE-TRIO» ártisteriniń kásibı sheberligi kórermenniń joǵary baǵasyn aldy.
«FORTE-TRIO» memlekettik trıosymen birge sahnada Qazaqstannyń eńbek sińirgen qaıratkerleri Aıgúl Nııazova (soprano) men Azamat Jyltyrkózov (barıton) óner kórsetti.
Ártister oryssha romanstardyń jarqyn úlgilerin oryndady.
