Konserttik baǵdarlamaǵa orys mýzykalyq romantızmi dáýirindegi vokaldyq mınıatıýralar enip, M.Balakırev, M.Mýsorgskıı, A.Borodın, N.Rımskıı-Korsakov, S.Kıýı syndy kompozıtorlardyń úzdik týyndylary shyrqaldy. Bul shyǵarmalardyń poetıkalyq negizin HIH ǵasyrdyń birinshi jartysyndaǵy orys aqyndarynyń óleńderi qurady. Romanstarmen jumys isteı otyryp, kompozıtorlar mán-maǵynaǵa, poetıkalyq mátindi tańdaýǵa, ony júzege asyrýdyń ekspressıvti quraldaryna úlken talaptar qoıdy.
Kesh barysynda tyńdarmandar mýzykalyq shedevrlerdi ártistermen bir sahnada otyryp tamashalady. Qazaqstannyń eńbek sińirgen qaıratkeri, «Qazaqkonserttiń» kórkemdik jetekshisi Tımýr Ýrmancheev atap ótkendeı, kórermender konserttiń tikeleı qatysýshysy bolyp, erekshe áser aldy.
«Juldyzben bir sahnada» jobasynyń arqasynda kórermender ártisterge jaqyn bola túsip, erekshe shyǵarmashylyq prosestiń qyr-syryn tereńirek sezine aldy. Oryndaýshy men tyńdaýshy arasyndaǵy dál osyndaı baılanys jańa konsertter men týyndylardyń paıda bolýyna shabyt berip, mádenı baılanysty arttyra túsedi. Búgingi kesh – jańa jobamyzdyń alǵashqy konserti. Aldaǵy ýaqytta bul joba turaqty túrde ótkiziledi. «Qazaqstan» Ortalyq konsert zalynyń bas sahnasy tolyqqandy kameralyq zaldyń fýnksııasyn atqardy. Zaldyń tamasha akýstıkasy osyndaı jańa tájirıbelerge jaqsy múmkindik berip otyr» dedi maestro.
FORTE-TRIO memlekettik trıosymen birge sahnada Qazaqstannyń eńbek sińirgen qaıratkerleri Aıgúl Nııazova (soprano) men Azamat Jyltyrkózov (barıton) óner kórsetti.
Aıta keteıik, jańa joba aıasynda maýsym aıynda elordalyq kórermenniń nazaryna túrli mýzykalyq baǵyttaǵy konsertter usynylady. Olardyń qatarynda qazaq ulttyq mýzykasy, folklorlyq aspaptyq áýender, klassıkalyq konsertter, zamanaýı mýzyka, avtorlyq keshter, hor-konsert pen spektaklder bar.
