«2020 jyly respýblıkalyq bıýdjettiń atqarylýy iskerlik belsendiliktiń aıtarlyqtaı tómendeýi men COVID-19 baılanysty qatań shekteý sharalary jaǵdaıynda júzege asyryldy.
Jalpy ishki ónim naqty 2,6 paıyzǵa tómendedi. Bul negizinen karantındik sharalardyń engizilýinen qyzmetter kórsetýdiń 5,4 paıyzǵa tómendeýine baılanysty boldy. Degenmen, ekonomıkanyń naqty sektory 2 paıyzǵa óskenin kórsetti.
Atap aıtqanda, qurylys – 11,2 paıyzǵa, aqparat jáne baılanys – 8,7 paıyzǵa, aýyl sharýashylyǵy – 5,6 paıyzǵa, óńdeý ónerkásibi – 3,9 paıyzǵa. Negizgi kapıtalǵa salynatyn ınvestısııalar kólemi 3,4 paıyzǵa tómendedi», dedi E. Jamaýbaev.
Onyń aıtýynsha, bıýdjettiń basym baǵyttary tótenshe jaǵdaı kezinde azamattardy jáne naqty sektordy qoldaýǵa arnalǵan shyǵystar boldy. Bul – áleýmettik tólemderdi ındeksteý, shaǵyn jáne orta bıznes sýbektilerine salyq aýyrtpalyǵyn tómendetý, «Jumyspen qamtý jol kartasy», «Bıznes jol kartasy», «Eńbek» jáne basqa da baǵdarlamalar. «Ekonomıkalyq ósimdi qalpyna keltirý boıynsha Keshendi jospar qabyldandy. Zardap shekken salalardan shamamen 700 myń kásipker salyqtyq yntalandyrý jáne jeńildik sharalarymen qamtyldy.
Shaǵyn jáne orta bıznes kredıtteri jeńildetilgen sharttarmen qaıta qarjylandyryldy. 40 myńǵa jýyq joba arzandatylǵan mólsherlememen qarjylandyryldy. Zardap shekken salalarda qaryz alýshylardyń 80 paıyzy kredıtter boıynsha tólemderin keıinge qaldyrý múmkindigin aldy. Osy sharalar jumyspen qamtý men iskerlik belsendilikti saqtaýǵa yqpal etti», dedi mınıstr.
Sonymen qatar ol jumyssyzdyq 4,9% deńgeıinde saqtalǵanyn aıtty.
«Bıýdjet prosesiniń ıkemdiligi qamtamasyz etildi, memlekettik satyp alýdyń arnaıy tártibi engizildi. Osyndaı jaǵdaılarda respýblıkalyq bıýdjettiń atqarylýy mynadaı kórsetkishtermen sıpattalady. Bıýdjet túsimderi 100,3 paıyzǵa oryndalyp, 12 trln 49 mlrd teńgeni qurady. Shyǵystar 98,3 paıyzǵa ıgerildi jáne 14 trln 234 mlrd teńgeni qurady. Áleýmettik shyǵystar 2019 jylmen salystyrǵanda 1,4 trln teńgege ulǵaıyp, 6,6 trln teńgeni qurady.
Bul respýblıkalyq bıýdjettiń jalpy kóleminiń 47 paıyzy. Bıýdjet tapshylyǵy 2 trln 185 mlrd teńge nemese jalpy ishki ónimniń 3,1%-y boldy. Memlekettik borysh qaýipsiz deńgeıde qalyp otyr», dedi Erulan Jamaýbaev.
