Sahna tórinde orkestrmen birge skrıpkashy, Qazaqstannyń halyq ártisi Aıman Musaqojaeva, sımfonııalyq orkestrdiń solısi Dastan Balaǵumarov óner kórsetti. Skrıpka men alt aspaptarynda Bethovenniń, Mosarttyń jáne otandyq kompozıtor Almas Serkebaevtyń týyndylaryn oryndaǵan solıster qalyń kórermenniń zor yqylasyna bólendi.
Aıman Musaqojaeva «Qazaqkonserttiń» bas sahnasyndaǵy bul sımfonııalyq kesh Táýelsizdiktiń 30 jyldyǵyna arnalǵanyn aıtty. «Bul – bizdiń karantınnen keıin uzaq kútken konsertimiz. Búgin úlken sahnada kórermen qaýymmen saǵyna kórisip, qaýyshtyq. Jańa konserttik baǵdarlama erekshe. Uzaq ýaqyt boıy karantınde bolyp, túrli qıyndyqtarǵa tótep bergen kórermen ataqty kompozıtorlardyń mýzykasy arqyly ómirdiń basty qundylyqtaryna jańasha kózqaras qalyptastyryp, mýzyka qudireti arqyly túrli emosııalardy sezine alady. Mýzyka árdaıym barshamyzǵa shabyt berip, rýhanı kúsh-qýat syılasyn», dedi skrıpkashy.
Sondaı-aq dırıjerlik tuǵyrda orkestrmen jumys istegen О́zbekstannyń eńbek sińirgen ártisi, dırıjer Kamolıddın Ýrınbaev ta orkestr ónerin joǵary baǵalady. «Mýzykalyq óner shekaraǵa baǵynbaıdy, mýzyka jáne talant – bizdiń ortaq tilimiz. Orkestrdiń sheberligi joǵary deńgeıde. Sondaı-aq Qazaqstanda klassıkalyq ónerge úlken qoldaý kórsetiletini erekshe qýantady», dedi maestro.
Aıta keteıik, bul merekelik kesh maýsym aıyndaǵy jańa konsertterdiń alǵashqysy ǵana. Bıyl óziniń 60-shy mereıtoılyq maýsymyn ótkizip jatqan «Qazaqkonsert» uıymy kórermen qaýymdy jazdyń alǵashqy aıynda oflaın formattaǵy taǵy 9 konsertpen qýantpaq. Atalǵan konsertter «Juldyzben bir sahnada» atty jańa joba aıasynda ótedi.
