Resmı delegasııany qarsy alǵan Amandyq Batalov óńir ekonomıkasynyń negizgi baǵyttary týraly qysqasha baıandady.
«Elimizde Transulttyq kompanııanyń qatysýymen 16 joba iske asyrylyp jatsa, sonyń 9-y – bizdiń Almaty oblysynda. О́ńir agroónerkásiptik salada, qant qyzylshasy, soıa, júgeri ósirýde kóshbasshy sanalady. Aýyl sharýashylyǵy ónimderin óńdeýde irgeli jobalar bar. Balamaly energetıkada da jemisti jumystar jasalyp jatyr. Biz sizdermen osy salalarda, sol sııaqty týrızm, turǵyn úı-kommýnaldyq sharýashylyq, sonyń ishinde gazdandyrý, kósheni jaryqtandyrý, káriz júıelerin jańǵyrtý, sonymen birge ırrıgasııalyq júıelerdi qalpyna keltirý baǵyttarynda yntymaqtastyq ornatýǵa peıilmiz. Taldyqorǵanda JEO salý josparda bar. Bul da - mańyzdy ári qajetti joba. Alda naqty baǵytymyzdy birlesip anyqtap, jemisti eńbek etýge sizderdiń de, bizdiń de tájirıbemiz jetedi dep oılaımyn», dedi Amandyq Batalov.
О́z kezeginde Dúnıejúzilik banktiń Qazaqstandaǵy turaqty ókili Jan-Fransýa Marton jetisýlyqtardyń jyly qabyldaýyna rızashylyǵyn bildirip, Dúnıejúzilik banktiń jumys ereksheligine, banktiń qoldaýymen Almaty oblysynda júzege asyrylyp jatqan jobalarǵa toqtaldy. Solardyń arasynda «Almaty-Qorǵas» jolynyń ınfraqurylymdyq jobasy, 2 mektep pen balabaqshany qamtıtyn energııa tıimdiligin arttyrý jobasy, sol sııaqty jastardy qoǵamdyq ómirge tartýǵa, olardyń ómirlik mashyqtaryn damytýǵa baǵyttalǵan jastar korpýsynyń jobasy bar.
Yntymaqtastyqty odan ári damytý maqsatynda Jan-Fransýa Marton bilim berý, sıfrlandyrý, jol ınfraqurylymy, ırrıgasııa, áleýmettik salalarda, ásirese, memlekettik-jekemenshik áriptestik aıasyndaǵy jobalardy qarjylandyrýǵa daıyn ekendikterin aıtty.
«Biz oblys aýmaǵynda yntymaqtasýǵa qyzyǵýshylyq bildirip otyrmyz. Buǵan deıin biz el Úkimeti arqyly ǵana jumys istedik. Endi oblys basshylyqtarymen tikeleı jumys isteý úshin birqatar qujattarǵa ózgerister engizip jatyrmyz. Bul baǵytta Almaty oblysynyń ákimdigimen birlesip jumys isteýge nıet bildirip otyrmyz», dedi Jan-Fransýa Marton.
Kezdesý barysynda Halyqaralyq qarjy korporasııasynyń Qazaqstandaǵy keńsesiniń basshysy Ekaterına Bendjamın de áriptestik baılanystaryn jandandyrýǵa yqylas bildirdi.
«Biz oblystyń áleýmettik-ekonomıkalyq damýyna oń yqpal etetin uzaq merzimdik jobalardy, sonyń ishinde qaldyqtardy joıý jáne ırrıgasııa baǵyttaryndaǵy jobalardy birge atqarýǵa daıynbyz», dep atap ótti ol.
Amandyq Batalov áleýmettik mańyzdy jobalardy júzege asyrýǵa yqpal etetin eki jaqty áriptestik baılanystardyń mańyzdylyǵyn atap ótti.
«Bizdiń yntymaqtastyǵymyzǵa odan ári serpin beretin búgingi kezdesýge kelgenderińizge qýanyshtymyn. Bul júzdesýdiń naqty jemisi kóp kúttirmeıdi dep oılaımyn», dedi sóziniń qorytyndysynda oblys ákimi.
Atap ótsek, Almaty oblysynyń 2021-2030 jyldarǵa arnalǵan ınvestısııalyq qorjynynda jalpy quny 5,5 mlrd teńge bolatyn, 45 myń jumys ornyn quratyn 592 joba bar. Sonyń ishinde quny 112,8 mlrd teńgelik, 3500 jumys ornyn quratyn 66 joba bıylǵy jyly iske asyrylady, 41 joba – AО́K salasynda, 11 – óńdeý ónerkásibinde, 4 – JEK jáne basqa da salalarda iske asyrylady.
