«Shyǵarmashylyq ujymymyz alǵash ret ashyq alańda óner kórsetkeli turǵan joq. Jyl saıyn Dj.Verdıdiń «Aıda» operasy syndy ǵalamat spektaklderdi ashyq aspan astynda oryndap júrmiz. Osyndaı jobalar aǵartýshylyq sıpatta jasalyp, asqaq ónerdi tanytýǵa baǵyttalyp otyr. Birqatar tosynsyı ázirledik, olardyń biri – Italııa, Shveısarııa, Japonııa, Reseı men Chehııadan kelgen sheteldik ártisterdiń óner kórsetýi», dedi «Astana Opera» teatrynyń dırektory, Qazaqstannyń eńbek sińirgen qaıratkeri Ǵalym Ahmedııarov.
Konsertterdiń baǵdarlamasy eresekterge de, balalar aýdıtorııasyna da ortaq. Jas kórermenderdi 13 jáne 19 maýsym kúnderi saǵat 12:00-de Affarı sahnasynda ótetin «Balalar syıǵa tartqan óner» atty konsert kútýde. Ár kúnderi balalarǵa jarqyn balettik jáne hor nómirleri usynylady. Balalar teatrlyq stýdııasynyń jetekshisi – Altynǵanym Ahmetova.
Al 13 maýsym saǵat 20:00-de Affarı sahnasynda ótetin «Vokaldyq mýzyka jaýharlary» konserti jeksenbilik keshtiń romantıkalyq áserin arttyra túspek. Kópshilik nazaryna operalardyń belgili arııalary men dýetteri, tanymal halyq ánderi men romanstar, aspaptyq pesalar usynylady. Mýzykalyq jaýharlar «Astana Opera» teatrynyń opera solısteri men orkestr ártisteriniń oryndaýynda usynylmaq.
Abzal Muhıtdınniń «Jyldyń segiz mezgili: Antonıo Vıvaldı men Astor Pıassolla» avtorlyq konserti 12-13 maýsym saǵat 20:00-de Ortalyq qalalyq saıabaqtaǵy amfıteatrda ótedi. Antonıo Vıvaldıdiń «Jyl mezgilderi» jáne Astor Pıassollanyń shyǵarmalary – óz zamanyndaǵy, sondaı-aq qazirgi tańda da ózekti mýzyka mádenıetiniń eń jarqyn úlgileriniń qatarynda. Solıster – «Astana Opera» sımfonııalyq orkestriniń birinshi skrıpkalary Baǵdat Ábilhanov pen Aısulý Baıkenova.
Apta sońynda 26 jáne 27 maýsym kúnderi saǵat 20:00-de Ortalyq qalalyq saıabaqtaǵy amfıteatrda Opera-gala usynylmaq. «Astana Opera» teatrynyń jetekshi opera solısteri, hor ártisteri men sımfonııalyq orkestri qazaqstandyq avtorlar men batys eýropalyq klassık kompozıtorlardyń operalyq arııalary men dýetterin, aspaptyq ári horǵa arnalǵan shyǵarmalaryn oryndaıdy.
Sonymen qatar «Astana Operanyń» biregeı jobasy – PICCOLO teatry 5 shilde kúni saǵat 20:00-de qalalyq saıabaqta óz repertýarynyń injý-marjany – Gaetano Donısettıdiń «Don Paskýale» eki bólimdi drama-býffasyn usynady. Qoıýshy dırıjer – Qazaqstannyń eńbek sińirgen qaıratkeri Abzal Muhıtdın, qoıylymnyń kórkemdik jetekshisi – Alla Sımonıshvılı, ssenograf ári kostıýmder boıynsha sýretshi – Manana Gýnıa. Oryndaýshylardyń juldyzdy quramy elordalyq jurtshylyq kóńilin qýantpaq. Norına – Lıbýshe Santorısova (Chehııa), Ernesto – Esýo Doı (Japonııa), Malatesta – Alekseı Shapovalov (Reseı), Don Paskýale – Antýan Bernheım (Shveısarııa), Karlıto – Erulan Kámel. Dırıjer – Korrado Valvo (Italııa). Al Astana kúninde (6 shildede) Ortalyq qalalyq saıabaqtaǵy amfıteatr sahnasynda merekelik Gala-konsert ótpek.
