Koronavırýs • 11 Maýsym, 2021

Ekpe alǵandarǵa elimizde qandaı artyqshylyqtar bar?

201 ret kórsetildi

Qazir ekiniń birin mazalaıtyn másele – Covid-19 ekpesin ektirý, ıakı ektirmeý. Munyń sebepteri de joq emes, dep habarlaıdy Egemen.kz.

О́zin-ózi oqshaýlaýdan qajyǵan jurtqa búginde ekpe paıdaly bolyp tur desek te, 2020 jylǵy tájdi indettiń alǵashqy tolqyny eldi jan-jaqtan qapsyrǵan tusta, dári-dármekter men aýrýhanalarda bos oryndardyń tapshylyǵy, mezgilsiz qazalar dúdámaldy oılardyń qalyń irgetasyn qalady.

Sonymen QR memlekettik Bas sanıtar dárigeriniń qaýlylarymen vaksına saldyrǵandarǵa beriletin artyqshylyqtar ulǵaıyp keledi. Ol qandaı artyqshylyqtar? Osynyń búge-shigesine deıingi suraqtarmen Almaty qalasynyń №11 emhana dáriger-epıdemıology Qarlyǵash Orazbaevaǵa habarlasqan edik.

«Sıfrlyq damý, ınnovasııalar jáne aeroǵarysh ónerkásip mınıstri Baǵdat Mýsın OKQ baspasóz-konferensııasy kezeńinde, osy aptanyń ishinde COVID-19 ekpesiniń tolyq kýrsynan ótken Qazaqstan Respýblıkasynyń azamattary qoǵamdyq oryndardyń barlyǵyna derlik erkin kirip-shyǵýǵa múmkindik beretin «Ashyq» qosymshasynda «jasyl» ahýalǵa ıe bolatynyn habarlady. «Jasyl ahýaldyń merzimi jarty jylǵa jaramdy, alaıda, bul ahýaldyń merzimi áli de rettelinetin bolady», deıdi Qarlyǵash Qýandyqqyzy.

COVID-19 qarsy ekpeniń tolyq kýrsyn qabyldaǵanyn rastaıtyn qujat usynylǵan jaǵdaıda Qazaqstan Respýblıkasyna áýe joldary arqyly shet elderden kelgen jáne shekarany qıyp ótetin tulǵalarǵa (dene qyzýy qalypty jaǵdaıda bolý shartymen) PTR ádisimen COVID-19 testisinen ótý talaby qoıylmaıdy.

«Budan bólek, COVID-19 qarsy ekpeniń tolyq kýrsyn qabyldaǵandy rastaıtyn qujat usynylsa, seriktestik bosanýlarǵa qatysqanda, naýqastardy, onyń ishinde júktilerdi, jas bosanǵandardy jáne balalardy stasıonarǵa (sonyń ishinde kúndizgi stasıonarǵa) josparly túrde aýrýhanaǵa jatqyzǵanda PTR anyqtamasy talap etilmeıdi.

Ekpe alǵandarǵa sábıler men balalar úılerine barǵanda, áleýetti ata-analardyń áriden ul asyrap alý/qyz asyrap alý, qamqorshy taǵaıyndaý, qorǵanshylyq úshin jetim balalarmen kezdesý úshin test tapsyrýdyń qajeti joq.

Áleýmettik-medısınalyq nysandarǵa qaıta túsken naýqastarǵa (qarttar úıleri, múgedekter jáne basqalary, naýqas balanyń kútimimen medısınalyq uıymdarǵa jatatyn tulǵalarǵa, uzaq jáne qysqa merzimdi kezdesýge ruqsat alý úshin penıtensıarlyq (qylmystyq atqarý júıesi) mekemelermen qamtylǵan tulǵalardyń týystaryna da shekteýler qoıylmaǵan. Bul tek búgingi kúnge, keleshekte ózgerýi múmkin», dedi epıdemıolog.

COVID-19 ekpesin almaǵandar men COVID-19 indetine shaldyqpaǵandar sońǵy 6 aıda qashyqtyq úlgide jumys isteýge kóshedi. Bular – ónerkásip mekemeleri men óndiris nysandarynyń jumysshylary, onyń ishinde jumysshynyń óndiristik nysanda bolýyn qajet etpeıtin jumystar, vahtalyq ádispen jumys isteıtinder.

Sonymen qatar bul talaptar sanatorılik-shıpajaı, demalys oryndary, qonaq úı, meıramhana, mádenıet, memlekettik organdar, bıznes ortalyqtar, mektepke deıingi balalar mekemeleriniń qyzmetkerleri, ıaǵnı qashyqtan mindetterin atqarý múmkin emes jumysshylardan basqasyna qatysty.

«Qan tazartý esebindegi naýqastar aldyn alý maqsatymen aıyna 1 ret PTR ádisimen COVID-19 testisinen ótýileri tıis. Eger, mundaı naýqas  ekpeniń tolyq kýrsyn qabyldaǵan bolsa, onda aı saıynǵy PTR ádisimen COVID-19 testisin tapsyrýdan bosatylady.

Shekteýish sharalaryn engizý kezeńinde stýdenttik jataqhanalarda bólmege qonystanýdy 50%-ǵa deıin toltyrýǵa bolady, bólmege 2 adam ǵana turýyna ruqsat. Eger stýdentterdiń 80% ekpeniń tolyq kýrsynan ótetin bolsa, onda bólmeni 100%-ǵa deıin toltyrýǵa bolady, tıisinshe, oryn sany kóbeıedi», degendi qosty epıdemıolog Qarlyǵash Qýandyqqyzy.

Aınash ESALY,

«Egemen Qazaqstan»

ALMATY

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar