Is-shara barysynda Japonııanyń elshisi Djýn Iаmada, Úndistannyń elshisi Shýbdarshını Trıpatı, sondaı-aq, Kambodjanyń Qazaqstandaǵy elshisi mindetin qosa atqarýshy Kım Heng Mıe jáne Shrı-Lankanyń Qazaqstandaǵy elshisi mindetin qosa atqarýshy Lamavansa Mıgahalande Dýrage senim gramotalaryn tabystady.
Memleket basshysy elshilerdi dıplomatııalyq mıssııalarynyń resmı bastalýymen quttyqtap, olardyń elimizdegi asa jaýapty qyzmetteri Qazaqstan Táýelsizdiginiń 30 jyldyǵymen tuspa-tus kelip otyrǵanyn atap ótti.
«Bizdiń elimiz egemendigin alǵan ýaqyttan beri kópqyrly jáne halyqaralyq quqyqqa negizdelgen teńgerimdi syrtqy saıasatyn tabysty júrgizip keledi. Shyǵys pen Batystyń ortasynda strategııalyq aýmaqta ornalasqan Qazaqstan Eýrazııaǵa qatysty máselelerde mańyzdy ról atqarady», dedi Prezıdent. Qasym-Jomart Toqaev sheteldik dıplomattarǵa Qazaqstannyń syrtqy saıasattaǵy basym baǵyttary, ekonomıkalyq jáne ınvestısııalyq múmkindikteri, óńirdegi qaýipsizdik pen turaqtylyqty qamtamasyz etýdegi qyzmeti, sondaı-aq, koronavırýs pandemııasy men klımattyń ózgerýine qarsy kúreste qabyldanyp jatqan sharalar jóninde málimet berdi.
Memleket basshysy óz sózinde Japonııa, Úndistan, Kambodja jáne Shrı-Lanka elderimen aradaǵy yqpaldastyq baǵytyndaǵy ekonomıkalyq múmkindikterdiń perspektıvalaryna egjeı-tegjeıli toqtaldy. Prezıdent Japonııa Elshisimen sóıleskende onyń eli Qazaqstannyń negizgi saıası, saýda jáne ınvestısııalyq seriktesteriniń biri ekenin atap ótti.
«Qazaqstan ekonomıkasy joǵary derjava sanalatyn, sondaı-aq, tehnologııa, «jasyl» ekonomıkany damytý, bilim berý jáne áleýmettik ádildik salalary boıynsha úlgi bolyp kele jatqan Japonııamen aradaǵy yqpaldastyqty nyǵaıtýǵa basa mán beredi. Byltyr Premer-Mınıstr Ioshıhıde Sýgamen telefon arqyly sóılestik. Áńgimemiz jemisti boldy. Meniń shaqyrýym boıynsha onyń Qazaqstanǵa jasaıtyn sapary jan-jaqty seriktestiktiń keleshek jol kartasyn qabyldaýǵa múmkindik beredi dep oılaımyz», dedi Memleket basshysy.
Qasym-Jomart Toqaev Úndistanmen aradaǵy yntymaqtastyq týraly aıta kele, eki eldiń strategııalyq seriktestigine joǵary baǵa berdi.
«Sizdiń elińiz qarqyndy damyp kele jatqan ekonomıkalyq ortalyq ári mańyzdy jahandyq memleket retinde qalyptasý jolynda orasan zor jetistikke jetti. Premer-Mınıstr Modımen óte tabysty kelissóz júrgizdik. Elińizdegi jáne álemdegi jaǵdaıdyń qalypqa kelýine qaraı Nıý-Delıge saparmen barý múmkindigin taǵatsyzdana kútemin», dedi Qasym-Jomart Toqaev. Qasym-Jomart Toqaev Kambodjamen ózara tyǵyz yqpaldastyqty damytý Qazaqstannyń Ońtústik Shyǵys Azııa aımaǵynda júrgizip otyrǵan syrtqy saıasatynyń bir bóligi ekenin aıtty.
«Bir beldeý – bir jol» bastamasyndaǵy Qazaqstannyń atqaratyn mańyzdy róli jáne Eýrazııalyq ekonomıkalyq odaqqa múshe bolýy ASEAN memleketterimen, sonyń ishinde, Kambodjamen aradaǵy qarym-qatynasty nyǵaıtýǵa jańa múmkindikter beredi. Osy jyldyń sońynda ótetin «Azııa – Eýropa» forýmynyń 13-sammıtine tabys tileımin», dedi Prezıdent.
Qasym-Jomart Toqaev Qazaqstan men Shrı-Lanka arasyndaǵy yntymaqtastyq jóninde aıta kele, teńizdegi jáne óńirdegi turaqtylyqty saqtaý úshin araldaǵy memlekettiń máni zor ekenine nazar aýdardy.
«Eki el arasyndaǵy ózara tyǵyz yntymaqtastyqty nyǵaıtýǵa múmkindik mol», dedi Memleket basshysy.
Saltanatty shara sońynda Prezıdent dıplomattarǵa tabys tilep, olardyń memleketteriniń basshylaryna júrekjardy sálemin joldady.
