F.Mogerınıdiń pikirinshe, Qazaqstan men EO tıimdi seriktestik qurýǵa umtylatyn ekijaqty múddege negizdelgen senimdi dıalog qura aldy.
F. Mogerınıdiń QR-EO qarym-qatynastaryn damytýǵa qosqan úlesi erekshe ekenin atap ótken jón. EO syrtqy saıası vedomstvosynyń basshysy retinde ol Qazaqstan men Eýropalyq Odaq arasyndaǵy Keńeıtilgen áriptestik pen yntymaqtastyq týraly kelisimdi talqylaýǵa qatysty jáne oǵan qol qoıdy. Bul kelisim óńirdegi osy ispettes alǵashqy qujat bolyp tabylady. Búgingi tańda Kelisim Qazaqstan men EO arasyndaǵy yntymaqtastyqty jańa deńgeıge shyǵaryp, ekijaqty qatynastardyń keń aýqymyn qamtıdy.
Sondaı-aq 2019 jyly EO-Ortalyq Azııa formatyndaǵy qatynastarǵa jańa serpin bergen, Eýropalyq Odaqtyń Ortalyq Azııa boıynsha jańa Strategııasy qabyldandy.
Kezdesý barysynda Qazaqstandaǵy saıası jáne ekonomıkalyq reformalar, QR jáne EO aýmaǵyndaǵy vaksınasııalaý úrdisiniń erekshelikteri, Qazaqstandyq «QazVac» vaksınasyn óndirý jáne paıdalaný máseleleri talqylandy.
Taraptar ıadrolyq qarýǵa qarsy qozǵalysty ilgeriletý jáne jańa halyqaralyq bastamaǵa – ıadrolyq qaýipsizdik pen ıadrolyq qarýdan azat álem úshin Jahandyq Kóshbasshylar Alıansyn qurýǵa erekshe toqtaldy. BUU joǵary deńgeıdegi tobynyń teń tóraǵasy jáne ıadrolyq qarýdy taratpaý máselelerimen belsendi aınalysqan burynǵy parlamentarıı retinde F.Mogerını bastamaǵa qyzyǵýshylyq bildirip, osy baǵyttaǵy óz tájirıbesimen bólisti.
Taraptar qazaqstandyq joǵary oqý oryndary, sarapshylar qoǵamdastyǵy jáne «Eýropa kolledji» arasynda jemisti yntymaqtastyq ornatý jáne birlesken bilim berý jobalaryn iske asyrý múmkindigin egjeı-tegjeıli zerdeleýge ýaǵdalasty.
