Bul shyǵarma qazaq sahnasynda alǵash ret qazaq tilinde qoıylyp otyr. Týyndyny qazaqshaǵa aýdarǵan – Memlekettik syılyqtyń laýreaty, aqyn Gúlnar Salyqbaı. Al qoıýshy-rejısseri – Ernazar Jańatilek.
Jańa qoıylymnyń shymyldyǵyn ashqan teatr dırektory, Qazaqstannyń eńbek sińirgen qaıratkeri Ashat Maemırov «О́li jandar» spektakli teatr ujymynyń jetinshi premerasy ekenin atap ótti. «Osydan týra júz jyl buryn, N.Gogoldiń ataqty «О́li jandar» poemasyna M.Býlgakov ınssenırovka jasady. Aq óleńmen jazylǵan poemany teatr tilinde sóıletken bolatyn. Al endi M.Býlgakovtyń «О́li jandary» qazaq sahnasy keńistiginde tuńǵysh ret qazaqsha sóılegeli tur. Sonymen qatar bıyl úlken álemdik ádebıettiń klassıgi bolyp esepteletin M.Býlgakovtyń 130 jyldyǵy. Sondyqtan da adamzatqa ortaq áıgili ádebı dramalardy qaldyrǵan uly dramatýrgke degen bizdiń jastarymyzdyń taǵzymy dep eseptesek bolady», dedi A.Maksımuly.
«О́li jandap» pesasy adamdardyń ómir súrýge degen qushtarlyǵyn ashatyn týyndy. Sondaı-aq qoǵamnyń ózekti máselelerin kóterip, olarǵa ózindik sheshim de aıtady. Máselen, sybaılas jemqorlyq. Ol óz kezeginde, memleketti quldyratyp, jetistikterdi joqqa shyǵaryp, adamdardyń rýhanı ómirine qaýip tóndiretin indet. Bul – barsha adamzatqa ortaq shyndyq. Týyndyda ózekti máseleler ashy ázilmen, oıly kúlkimen aıtylyp, kórermendi shynaıylyq, adaldyq áleminiń tereńine boılatady.
Aıta keteıik, bul – teatrdyń jas rejısseri Ernazar Jańatilektiń ekinshi qoıylymy. Ol buǵan deıin F.Dostoevskııdiń «Uldar» spektaklin qoıǵan bolatyn. Premeranyń daıyndalý barysy týraly aıtqan rejısser, jańasha janrdyń ereksheligine toqtaldy. «Tragı-fars janrynda kóbinese akterdiń oıynynda, sahna dekorasııasynda, mýzykada erkindik bar. Iаǵnı sıýjet zamanaýı fars túrinde oınalady. Al spektakldi daıyndaýǵa bir jarym aıdaı ýaqyt ketti. Mundaǵy basty ıdeıa – bas keıipker Chıchıkovtiń saldary aýyr soqqan qatelerin kórsetkimiz keldi. Jalpy, bul qoıylymda jaǵymsyz keıipker joq: báriniń ózindik jaqsyly-jamandy qasıetteri bar», dedi ol.
Premerany tamashalaǵan Parlament Májilisiniń depýtaty, aqyn Maqpal Mysa teatr jastarynyń izdenimpazdyǵy, jańashyldyǵy, bul shyǵarmaǵa kreatıvti oımen barýlary kórermenge óte joǵary áser qaldyrǵanyn aıtty. «Negizi, shyǵarmanyń túpnusqasyn oqyp qaraǵanda áseri bólek bolady. Ony qoıylym arqyly kórý tipten basqa atmosfera beredi. Teatr óneriniń ereksheligi de sol shyǵar, rýhyńdy qozǵaıdy, erekshe áserde bolasyń. M.Býlgakovtyń jalpy shyǵarmalary óte erekshe. Astarly oımen jetkizedi. Kórermenderge jalpy ashyq nárse aıtpaıdy. Kórermen ózi oı túıýi kerek. Qoıylymda maǵan jastardyń shynymen de talanttary qatty áser etti», dedi aqyn.
Chıchıkov rólin – Asylhan Tólepov pen Aman Ǵumarov, Manılovty – Abzal Arapov, Mıhaıl Semenovıch Sobakevıchti – Azamat Bolatov, Plıýshkındi – Aqádil Imanǵalı, Nozdrevti – Qazybek Esqara, Nastasıa Petrovna Korobochkany – Maqpal Dúısen, Ilıa Ilıchti – Shalqar Muraltaı, Polıseımeısterdi – Salamat Muqashev, Qamqorshylyq keńesiniń hatshysyn – Talǵat Keńes, Mavrany – Alfııa Haızýllıeva, Mıjýevti – Álıhan Álisher, Petrýshkany – Elaman Imanbaev, Selıfandy Aqqanat Qýandyq somdady.
