Tobyl óńirinde turǵyn úı qurylysy qarqyndy

Sońǵy 5 aıdyń ishinde oblysta 163,6 myń sharshy metr turǵyn úı boı kótergen. Halyqty turǵyn úımen qamtýǵa qatysty jobalardyń deni Qostanaı qa­lasynda júzege asyrylyp jatyr. Ob­lys ortalyǵynda soń­ǵy jyldary «Aeroport», «Iýbıleınyı», «Bereke» dep ata­latyn jańa shaǵyn aýdandar salyndy. Nátıjesinde, kezinde qalanyń mańynda paıdaǵa asyrylmaı, bos jatqan jerlerge salynǵan kópqabatty záýlim úılerge qonystanyp, mektepter men mádenıet ǵımarattary, basqa da áleýmettik nysandar paıda boldy.

– Búginde «Aeroport» sha­ǵyn aýdanynda bıýdjet qar­jysyna salynǵan 37 kópqa­batty turǵyn úıdiń qurylysy aıaq­taldy. Jalpy aýdany 192 myńnan asatyn 2 589 páterge turǵyndar qonystandy. Endi jyl aıaǵyna deıin taǵy da 360 páterli kópqabatty 4 turǵyn úıdiń qurylysy aıaqtalady. «Iýbı­leınyı» shaǵyn aýdanynda 41 kópqabatty turǵyn úı salynyp, 4 myńnan astam páter paıdalanýǵa berildi. Bıyl bul shaǵyn aýdanda kópqabatty 6 úı salynyp jatyr. Onyń qurylysy jyl sońyna deıin bitedi. Osymen «Aeroport» jáne «Iýbıleınyı» shaǵyn aýdandaryndaǵy qurylys ju­mystary túbegeıli aıaqtalady, – dedi oblystyq qurylys, sáý­let jáne qala qurylysy bas­qarmasynyń basshysy Berik Tań­jaryqov.

2021 jyly óńirde «Nurly jol» baǵ­dar­lamasyn júzege asyrýǵa respýblıka bıýdjetinen 9,3 mlrd teńge bólingen. Aldaǵy ýaqytta negizinen Qos­tanaıdyń «Bereke», «Qonaı» dep atalatyn shaǵyn aýdandarynda qurylys jumystary qyza túsedi. Búginde «Berekede» kópqabatty 9 turǵyn úı boı kótergen. Jel­toqsan aıyna deıin jergilikti «BK stroı» qurylys kompanııasynyń qarjysyna dál osyndaı taǵy 4 úı salynady. Al Qostanaıdan Rýdnyı qalasyna shyǵa beristegi «Qonaı» shaǵyn aýdanynda bıyl 855 páterli 19 úıdiń qurylysyn aıaqtap, paıdalanýǵa berý jos­parlanyp otyr. Oblys ákimi Arhımed Muhambetovtiń aıtýynsha, munda jalpy aýdany 71,6 myń sharshy metr bolatyn bes qabatty 30 úı jáne 2 myń­nan astam jeke turǵyn úı boı kóteretin bolady. Bıyl 5 qabatty 30 úı­diń qurylysy bas­taldy. Onyń syrtynda, jańa shaǵyn aýdanda jeke turǵyn úı salýǵa 2 myń sharshy metrden astam jer ýchaskesi beriledi.

Sonymen qatar Qostanaı aýdanyndaǵy Tobyl qalasy men Mıchýrın kentinde «Báıterek» jáne «Astana» dep atalatyn jańa shaǵyn aýdandar paıda bolady. Jospar boıynsha, bıyl irgesi qalanǵan shaǵyn aýdandarǵa eki jyl ishinde jurt qonystanýy tıis. Bul aýmaqta 9 qabatty 45 turǵyn úı paıdalanýǵa beriledi dep kózdelip otyr. Joba boıynsha barlyǵy 5 myń páter paı­dalanýǵa berilýi tıis. Qos­tanaı aýdany ákimdiginiń málimetinshe, búginde Tobyl qalasynda jaldamaly bas­pana kezeginde 2 myńǵa jýyq adam tur. «Báıterek» jáne «As­tana» shaǵyn aýdandarynda boı kóteretin jańa úıler paı­dalanýǵa berilse, bul másele tolyqtaı óz sheshimin tappaq. Munyń syrtynda 2023 jyly Tobyl qalasynda «Nur Álem» atalatyn jańa shaǵyn aýdannyń qurylysy bastalyp, munda 5 qabatty 24 turǵyn úı salynatyn bolady. Osy maqsatta aýda­n ákimdigi qosymsha 550 jer ýchaskesin qarastyryp qoıǵan.

Al Rýdnyı qalasyndaǵy Vostochnyı kóshesinde kópqabat­ty 8 turǵyn úıdiń qurylysy qa­battasa júrip jatyr. Taıaý­da ǵana kenshiler qalasyna jumys saparymen barǵan aımaq basshysy osy nysannyń qurylys barysymen tanys­ty. Bul úıler paıdalanýǵa berilgen soń, eń birinshi kezekte kenshiler men kópbalaly otbasylar, muǵalimder men temir­jolshylarǵa baspana berilmek.

Nesıege páter alýǵa múmkin­digi joq muqtaj otbasylar úshin bıyl jaldamaly baspana qu­rylysyna 1910,6 mln teńge qar­jy qarastyrylǵan. Bıyl oblys­tyń 4 eldi mekeninde jalǵa beriletin turǵyn úıler qu­rylysy aıaqtalady. Atap aıt­qanda, Qostanaı qalasynyń «Iýbıleınyı» shaǵyn aýdanynda 468 páterli 4 kópqabatty úıdiń jáne Rýdnyı qalasynda 50 páterli, Lısakov qalasynda 60 páterli, Fedorov aýdanynda 24 páterli bir-bir turǵyn úı el ıgiligine berilmek. Munyń syrtynda oblys ortalyǵynda Otbasy banki arqyly beriletin baspana qurylysy qarqyn aldy. Jyl basynda «Iýbıleınyı» shaǵyn aýdanynda 243 páterli 2 úı paıdalanýǵa berilgen bolatyn. Dál osy aýdanda jyl sońyna deıin taǵy da 120 páterli 2 úıdiń qurylysy aıaqtalyp, bas­pana kezeginde turǵan jas otbasylar qonystanady dep josparlanyp otyr. Onyń syrtynda, «Áýejaı» shaǵyn aýdanynda osy sekildi uzyn-yrǵasy 324 páterge jetetin 4 birdeı baspana paı­dalanýǵa berilmek.

– Oblysta jyl basynan beri paı­dalanýǵa daıyn 841 páter qabyldanyp alynǵan. Bul – ótken jyldyń osy mer­zimimen salystyrǵanda 242 páterge ar­tyq. Paıdalanýǵa daıar kúıinde tap­syrylǵan baspanalardyń 84-i – jaldamaly páter, 234-i JAO oblıgasııalar arqyly Otbasy banki arqyly beriletin nesıelik páterler. Al kommersııalyq turǵyn úıler sany 378, budan ózge 145 jeke turǵyn úı bar. «Nurly jer» baǵdarlamasy aıa­synda bıyl 612 otbasy bas­pana alýǵa múmkindik aldy. Olardyń ishin­de 101-i kópbalaly otbasy, 60 muǵalim, 146 dáriger bar, – dedi Berik Tań­jaryqov.

Sońǵy tórt jyldaǵy máli­metterge júginsek, oblysta osy kezeń aralyǵynda 1 mln sharshy metrden astam turǵyn úı salynǵan. Osy ýaqyt ishinde turǵyn úı qurylysyna 100 mlrd teńge ınvestısııa tartylyp­ty. Nátıjesinde, 10 myńnan as­tam otbasy ózderiniń turǵyn úı jaǵdaılaryn jaqsartqan. Olardyń deni – turǵyn úı qurylys jınaq bankiniń salymshylary. Fılıal dırektory Dáýren Saýdabaev banktiń árbir jetinshi salymshysy nesıe resimdep, baspanaǵa ıe bolǵanyn aıtady. Onyń sózinshe, búginde banktiń oblystaǵy fılıalynda 65 myńnan astam turǵynnyń páter satyp alýǵa qarajaty bar. Atalǵan bank taıaýda «Baqytty otbasy» baǵdarlamasyna qaty­sýshy azamattardyń da esep-qı­sabyn jarııa etti. Byltyr jalpy quny 1,5 mlrd teńge bolatyn 208 ótinish qaralyp, onyń 206-sy maquldanǵan. Dál osy jobany qos­tanaılyq kásipkerler men aýyl sharýashylyǵy taýa­r óndirýshileriniń belsendi qol­daǵanyn da aıta ketken abza­l. Máselen, óńirdiń atymtaı aza­­mattary 20 shaqty muqtaj otba­synyń úıin jóndep bergen.

Oblys ákimdigi byltyr shilde aıynda el boıynsha birinshi bolyp «Qazaqstan ıpotekalyq kompanııasy» ıpotekalyq uıymy» AQ-men Qostanaı oblysynyń 350 medısına qyzmetkeri úshin 3 jyl boıy jalǵa beriletin turǵyn úıdi sa­tý týraly kelisim jasasqan edi. Osy jyly Qos­tanaı qalasynda atalǵan ak­sıo­nerlik qoǵam arqyly mem­lekettik qyzmetshilerge 54 pá­ter berilmek. Jal­py, búginge deıin óńirdegi qalalar men aýda­n ákimdikteri qyzmetke kelgen 146 mamandy turǵyn úımen qamtamasyz etken. Memleket pen jeke kásipkerlerdiń áriptestigi aıasyndaǵy jobalardy sátti iske asyrǵandar qata­rynan Ar­qalyq qalasyn erekshe atap ótken durys. Bul qalada byltyr 112 pá­ter­lik turǵyn úı qaıta jańǵyrtylyp, halyq ıgiligine tapsyryldy.

Oblystyq qurylys, sáýlet jáne qala qurylysy basqar­masynyń basshysy óńirde aldaǵy jyldary da kóppáterli úıler qurylysynyń ulǵaıa bere­tinin aıtyp otyr. Bıyl 384,9 myń sharshy metr turǵyn úı salý josparda bar. Al kelesi jyly 3 590 páter paıdalanýǵa berilmek. Oblysta jeke turǵyn úı qurylysy da qarqyndy júrip jatyr. Bıyldyń ózinde 116,4 myń sharshy metr aýmaqqa jeke turǵyn úı salý josparda bar. Aldaǵy jyly 110, al 2022 jyly 111 myń sharshy metr aýmaqqa jeke úıler salynbaq.

Aldaǵy ýaqytta erekshe ek­pin túskeli otyrǵan «Qonaı» shaǵyn aýdanynyń kele­­shegi jarqyn bolmaq. Sondaı-aq óńir kartasynda bir-eki jyl bu­­ryn ǵana paıda bolǵan To­byl qalasyn damytý jospary daıyn. Búginde Qostanaı qala­sy­nyń irgesinde turǵan Zarech­nyı aýylyndaǵy «Sever­nyı» shaǵyn aýdany qury­lysynyń da ekpini erekshe.

Jalpy, 1991-2020 jyldar ara­lyǵynda Qostanaı oblysynda 5 mln 839,4 myń sharshy metr turǵyn úı, ıaǵnı 60 myńnan astam páter paıdalanýǵa berilipti.

Qostanaı oblysy