– Bıyl oblysta jańa kásip bastaǵysy keletinder tuńǵysh ret Jumyspen qamtýdyń jol kartasy aıasynda nesıelendiriledi. Bul maqsatqa respýblıka boıynsha barlyǵy 22,5 mlrd teńge qarastyrylǵan. Sonyń 1 mlrd teńgesi Qostanaı oblysyna buıyrdy. Shaǵyn nesıeniń óteý merzimi – 5 jyl. Al mal sharýashylyǵymen aınalysatyndar qaryzyn 7 jylǵa deıingi merzim ishinde qaıtara alady. Aýyl jáne shaǵyn qala turǵyndaryna 2500 AEK, ıaǵnı 7 mln 292 500 teńge, al qalalar men monoqalalarda turatyn kásipkerlerge 6 500 AEK-ke deıin nesıe beriledi. Sońǵylary 19 mln-ǵa jýyq qarjyny jeńildikpen nesıege ala alady, – dedi Qostanaı oblystyq kásipkerler palatasynyń sarapshysy Leıla Aqtaeva.
Bıyl óńirde «Bastaý-Bıznes» jobasy boıynsha 1 250 adam bilim alady dep josparlanǵan. Búginge deıin 627 turǵyn sertıfıkat alyp úlgerse, 249 adam oqýdy jalǵastyryp jatyr. Oblystyq kásipkerlikti qoldaý palatasynyń málimetinshe, bıyl jobany támamdaǵan 170 túlek jeke kásip ashý maqsatynda qarjy granttaryna qol jetkizgen. Al 61 adam jeńildetilgen nesıe alǵan. 14 maýsymnan bastap jobanyń úshinshi legine qatysqysy keletinderden ótinish qabyldana bastaıdy. Oǵan jumyssyzdar men jumysy bar adamdardyń jekelegen sanattary qatysa alady.
«Bastaý-Bıznes» jobasy aıasynda kásipkerlik negizderin meńgergisi keletin turǵyndar bilim kýrstaryna qatysýǵa joldama alý úshin áýeli jumyspen qamtý ortalyqtaryna barýy kerek.
Qostanaı oblysy
