Almaty oblysy Eńbekshiqazaq aýdanynyń №2 aýdandyq sotynda 2 naýryz kúni mas kúıinde tórt oqýshy qyzdy qaǵyp ketken Áset Demesinovke qatysty úkim shyǵaryldy. Zardap shekken qyzdar 8-9 jasta bolatyn. Olardyń ekeýi qaıtys boldy, úshinshisi aýrýhanaǵa tústi, onyń densaýlyǵyna ortasha aýyrlyq dárejesinde jaraqat kelgen. Prokýror sottalýshyny kólik quralyn basqarý quqyǵynan ómir boıyna aıyra otyryp, 10 jylǵa bas bostandyǵynan aıyrý jazasyn taǵaıyndaýdy surady. Jaza taǵaıyndaý kezinde sot Demesinovtiń shyn júrekten ókinish bildirýin, onyń minez-qulqyn jáne keltirilgen zııandy tolyq óteýin eskerdi.
Sot sondaı-aq zardap shekken taraptyń er adamdy keshirmegenin, oǵan zańǵa sáıkes qatań jaza suraýyn eskerdi.
Nátıjesinde sot kólik júrgizý quqyǵynan ómir boıyna aıyra otyryp, 10 jylǵa bas bostandyǵynan aıyrý túrindegi eń aýyr jazany taǵaıyndady. Sot jábirlenýshilerdiń bireýiniń talaptaryn qanaǵattandyrdy, Demesinov qaıtys bolǵan qyzdyń anasyna 10 mıllıon teńge kóleminde moraldyq shyǵyn tóleýi kerek.
