Jambyl beınesin jazǵan qylqalam sheberleri aqyn ómiriniń keń tanylǵan, sońǵy on jylyn kóbirek qamtyǵan. Jambyldy tirshiliginde óz kózimen kórip beınelegen B.Chekalın, Á.Qasteev, R.Ardatov, N.Iаgodkın sekildi sheberler dala perzentiniń qarttyq shaǵyn dál keıipteıdi. B.Chekalınniń: «Jambyl týyndylary kúndelikti ómirmen ushtasyp jatty, keıipkerdiń árbir sátin kózden tasa jibermeı beıneleýge tyrystym» deýi tegin emes. Jambyl taqyrybyndaǵy toptamasy uly jyraýdyń ómir jolyn kenep arqyly baıandaıtyn keń kólemdi monografııaǵa aınalǵan sýretshi aqyn jyrlaryn jan dúnıesimen zerdelegeni anyq.
Jambyl beınesine birneshe ret toqtalǵan Á.Qasteev te aqynǵa arnap «Halyq aqyny Jambyldyń portreti» (1937), «Jambyl dostary arasynda» (1971) atty týyndylaryn jaryqqa shyǵardy. О́nertaýshy Laýra Ábildaevanyń paıymynsha: «Á.Qasteev Jambyldy qansha ret beınelese, sonsha ret birin-biri qaıtalamaıtyn kelbet jasady. Ol ótken eńbekterin qaıtalamaý úshin aqynnyń psıhologııalyq ishki jan dúnıesiniń alýan qyryn asha bildi».
Jambyl aqynnyń jarqyn beınesi músin ónerinen de tys qalǵan joq. 1938 jyly Qazaqstanǵa kelip, Jambyldy óz kózimen kóre júrip, onyń beınesin jasaýmen aınalysqan máskeýlik músinshilerdiń biri, I.Andreev edi. Taǵylymdy tulǵany tastan qashaǵan talant ıesi ımpressıonıstik tásilde keıipkerdiń bir sáttik kóńil kúıin dál kórsetken.
Qazaqstannyń músin óneriniń negizin qalaýshy H.Naýryzbaev óz shyǵarmashylyǵynda Jambyldyń balalyq shaǵynan bastap, qartaıǵanǵa deıingi aralyqtaǵy búkil ómirin qamtyǵan týyndylar toptamasyn jaryqqa shyǵardy. Kórme qabyrǵasynan H.Naýryzbaevtyń «Jas Jambyldyń bas beınesi» (1950) men qarııa «Jambyldyń portreti» (1966) týyndylaryn kórýge bolady. Sonymen qatar músinshiniń qoladan jasalǵan «Jas Jambyl» (1958) atty týyndysy Á.Qasteev mýzeıiniń turaqty ekspozısııasynda ornalasqan. Bul jumysynda músinshi jalań aıaq dala kezip, dombyrasyna qosylyp án salyp kele jatqan bala aqyndy tutas tulǵasymen kórsetken.
– «Baqyt týraly jyr» kórmesindegi sheberler qoltańbasy «HH ǵasyrdyń Gomeri» – Jambyl Jabaevtyń epıkalyq beınesin naqty kórsetýge tyrysqan. Jambyl jyrlaryndaǵy izgilik pen ádildik patshalyǵy týraly adamzattyń máńgilik armany, barlyq ýaqytta adamdy biriktirgen baqytty jarqyn bolashaqqa degen úmit aıtylady, – deıdi Laýra Ábildaeva.
ALMATY
