«Kıds goý frı» (Balalar tegin saıahattaıdy) baǵdarlamasynyń negizgi maqsaty – qazaqstandyqtardy eldiń týrıstik oryndarynda otbasymen demalýǵa yntalandyrý. Bul balalardyń áýebıletterin sýbsıdııalaý arqyly iske asyrylady.
Erjan Erkinbaevtyń aıtýynsha, «Kıds goý frı» týrpaketin kez kelgen týroperatordan satyp alýǵa bolady.
«Nelikten áýe reısteri sýbsıdııalanady? Qazaqstandyqtar óz balalaryna elimizdiń basqa da óńirlerin tamashalap, kórsetýi úshin sýbsıdııa beriledi. Bizde ádemi landshaftar kóp -13 ulttyq saıabaq bar. Kópshiligimiz óz óńirimizden tys jerlerge shyqpadyq. Bul jaqsy múmkindik bolady, sondyqtan bul baǵdarlamany týystarynyń úıinde bolýmen salystyrýǵa bolmaıdy dep sanaımyn», dedi Erjan Erkinbaev.
QR Mádenıet jáne sport mınıstrligi Týrızm ındýstrııasy komıtetiniń tóraǵasy Dastan Ryspekov jaýapty boljamdy eseptermen tolyqtyrdy.
«Eger siz týroperatordy tartpaı, óz betińizshe ushatyn bolsańyz, sáıkesinshe sizge balalar bıletteriniń quny sýbsıdııalanbaıdy. Bul jaǵdaıda vaýcherdiń quny 20-30 paıyzǵa arzandaıdy dep boljaımyz. Mysaly, Biz Nur-Sultannan Alakólge saıahat jasaımyz. Úsh balasy bar otbasy bir aptaǵa ushady delik. Bul olarǵa ushýdy qosa alǵanda, shamamen 350-400 myń teńge turatyn bolady. Bul somanyń 100 myń teńgesi balalar úshin baryp-qaıtý bıletterine ketedi. 350-den 100 myń alamyz, demalystyń quny 250 myń teńgeni quraıdy. Eger siz uıymdastyrylǵan demalysty paıdalanǵyńyz kelse, onda bul júıeniń kómegimen arzanyraq bolady», dep sendirdi Dastan Ryspekov.
