Aımaqtar • 17 Maýsym, 2021

Densaýlyǵyń qalaı, dáriger?

291 ret kórsetildi

Jeksenbide kovıdstasıonarǵa shuǵyl jetken Saltanat Satybaldyqyzy óte aýyr haldegi júkti áıeldi aman alyp qalýdyń barlyq jolyn qarastyrdy. Kerekti mamandar shaqyryldy, konsılıým ótkizildi. Ota jasalyp, jeti aılyq náreste jaryq dúnıege keldi, ana da aman.

Iá, bul – maýsym aıynda órshigen indetpen arpalystyń bir ǵana sáti. Sol kúnnen keıin demalyssyz jumys istegen, aýyr haldegi naýqastardyń ómiri úshin kúresken Kentaý qalasy ortalyq aýrýhanasynyń bosaný bóliminiń meńgerýshisi, akýsher-gınekolog Saltanat Qudaıbergenova otbasymen tek telefon arqyly baılanysyp otyrdy. Otaǵasy aýyrǵanda da telefon arqyly keńes berip, dári-dármek belgilegen. Alaıda...

«Joldasymnan aıyryldym... О́te aýyr kúnderdi bastan ótkerdim. Mundaı qaıǵyny eshkimge tilemeımin, indetten Alla saqtasyn! Qanshama dáriger pnevmonııamen aýyrdy. Men ózim bir jarym aı aýyryp jattym. Áriptesterime, aqhalatty abzal jandarǵa basymdy ıemin. Eren eńbegin, batyrlyǵyn kórsetti. Bas dárigerimiz Gúlbaný Jumaǵalıqyzy bizge rýh berip, jigerlendirip, moraldyq kómek kórsetip, qoldap otyrdy», deıdi kózine jas ala sol kúnderdi esine túsirgen joǵary sanatty dáriger, medısına ǵylymdarynyń kandıdaty Saltanat Qudaıbergenova.

Janyńdy janap ótken ár adam taǵdyr kitabyńda izin qaldyrady. Iá, byltyrǵy maýsymda órshigen indetpen kúres dárigerlerdiń de júregine syzat túsirdi. Aýyr haldegi naýqastar, aýa jetispeı alasuryp jatqandar, qatary eselep artqan qaıtys bolǵandar dárigerlerdiń, jalpy aqhalatty abzal jandardyń júregin aýyrtty. Árbir naýqasty aman qalyp qalý úshin qoldaǵy bar amaldy jasap, jantalasqan dárigerler júregine túsken syzat, júıkeni juqartqan salmaq densaýlyǵyna da keri áser etkeni anyq.

«Sol kúnderi úıdi umytyp, jumys istedik. 21 maýsymda 50 adamǵa deıin qabyldaý bólimine kelip qaraldy. Bas dáriger barlyǵymyzdy shaqyryp, provızorlyq bólimde naýqastarǵa kómek kórsetýge úndedi. Árıne árbir dáriger, medbıke erikti túrde kelisim berip jumysqa kiristik. Qorqynyshtyń bolǵanyn da jasyrmaımyz. Ásirese óz áriptesterimizdiń indetke shaldyqqany, olardy aman alyp qalý múmkin bolmaǵany kópshiligimizge oı saldy. Biraq biz antqa adaldyq tanytyp, bar oıymyz naýqastardy aman alyp qalý bolyp, sol maqsatta aıanbaı eńbek ettik. Qolymyzdan kelgen bar múmkindikti jasadyq. О́zimiz tanıtyn, kásibıligin joǵary baǵalaǵan jansaqtaý bóliminiń meńgerýshisi Baqytbek aǵaı, Qurkeles emhanasynyń gınekolog-dárigeri Jumadilla Ibadýllaev aýyryp, ekeýi bir kúnde kóz jumdy», deıdi Saryaǵash aýdandyq ortalyq aýrýhanasy, ishki aýrýlar bóliminiń meńgerýshisi Quralaı Ábilmájinova. Sol kúnderi qanshama dáriger, meıirbıke ózderin jaısyz sezingenimen, óz densaýlyǵyna mán bermeı jumysyn jalǵastyrdy.

Oblystyq №3 perınataldyq ortalyǵynda pandemııa kezinde 8 medısına qyzmetkeri dertke shaldyqqan. Qazirgi kúni olar óz jumystaryn jalǵastyrýda, densaýlyqtary jaqsy. Ortalyq basshylyǵynyń habarlaýynsha, olar memleket tarapynan arqaısysy 2 mln teńge járdemaqy alǵan. О́kinishke qaraı, ómirden ozǵandar da bar.

«Jas bolsa da bilimdi, bilikti, jaýapkershiligi mol, ujymda bedeldi bolǵan jas maman, qoǵamdyq densaýlyq saqtaý dárigeri-statıst Janar Baýyrjanqyzy qaıtys boldy. Q.A.Iаsaýı atyndaǵy HQTÝ-dyń medısına fakýltetin bitirgen mamannyń artynda eki balasy qaldy. Oblystyq perınataldyq ortalyq Túrkistan, Kentaý qalalary, Sozaq, Otyrar aýdandaryna qyzmet kórsetedi. Ortalyqta 73 dáriger, 337 orta býyndy, 150 kishi medısına jáne basqa da qyzmetkerler eńbek etýde. Dárigerlerdiń orta jalaqysy 420 myń teńge, negizinen baspanamen qamtylǵan. «Turǵyn úı» baǵdarlamasy arqyly 14 dáriger kezekte tur», deıdi qyzmetkerleriniń búgingi áleýmettik jaǵdaıynan habardar etken ortalyqtyń bas dárigeri Nurjan Mahmýtov.

Qaterdiń ortasynda júrip ajal qushqandar, ókinishke qaraı, úshinshi megapolıs – Shymkentte de az emes. Indetpen kúreste kásibı mindetin atqarý kezinde 21 medısına qyzmetkeri koronavırýstan baqılyq boldy.

«Marqum bolǵan medısına mamandarynyń týystaryna 10 mln teńgeden ótemaqy tólendi. Qıyn kezeńde halyqtyń amandyǵyn oılap, aıanbaı eńbek etip, qaıtys bolǵan dárigerlerdiń artynda qalǵan urpaqtaryna «Barys», «Parasat», «Qurmet» ordenderi tabystaldy. Memlekettik nagradany qala ákimi Murat Áıtenov marqumdardyń otbasyna arnaıy baryp tabys etti. Buǵan qosa ár otbasyna materıaldyq kómek retinde «Qaıyrymdy qala» qorynan bólingen 1 mln teńge kóleminde qarjylaı kómek berildi», deıdi Shymkent qalalyq densaýlyq saqtaý basqarmasynyń basshysy Baqytjan Pozılov.

Sońǵy jyldary áleýmettik jaǵdaılary jaqsaryp, eńbekaqylary artqany da aıtyldy. Medısına qyzmetkerlerin baspanamen qamtý máselesi de oń sheshimin taýyp jatyr eken. Mysaly, Shardara qalasynda syrttan kóship kelgen dárigerler qyzmettik úı-jaımen qamtylady. Jas mamandardy jańa salynyp jatqan úılerge ornalastyrý joly qarastyrylady. Iаǵnı dárigerlerdiń óz qyzmetin alańsyz atqarýyna barlyq jaǵdaı jasalýda. Al aqhalattylardyń amandyǵyn tileıtin turǵyndardyń jalǵyz talaby – adal da minsiz qyzmet. Densaýlyǵyń myqty bolsyn, dáriger!

 

Túrkistan oblysy

Sońǵy jańalyqtar

Indet qaıta órshidi

Álem • Keshe

О́ńirde damý úrdisi bar

Aımaqtar • Keshe

Tańdaıdyń tarlany

Tarıh • Keshe

Joǵalǵan soldat

Tarıh • Keshe

Dombyrany dáriptedi

Rýhanııat • Keshe

Almatyda 36 gradýs ystyq bolady

Aýa raıy • Keshe

Búgin - Ulttyq dombyra kúni

Qazaqstan • Keshe

Uqsas jańalyqtar