Elorda 20 jyldyń ishinde qanatyn keńge jaıdy. Esildiń eki beti qaınaǵan tirlik. Oń jaǵalaý eski tarıh, qazynaly shejire bolsa, sol jaǵalaý erteńge umtylǵan, bolashaqtyń beınesi ispetti. Tipti qala halqynyń teń jartysy sol jaǵalaýdy mekendeıtindeı kórinedi keıde. Munda astanalyqtar men barlyq qazaqstandyqqa joǵary deńgeıde túrli medısınalyq kómek kórsetetin zamanaýı ortalyqtar kóp ornalasqan. Ulttyq neırohırýrgııa, Kardıologııa, Onkologııa, Ana men bala, Respýblıkalyq dıagnostıkalyq ortalyq syndy klınıkalar qatar túzegenimen, turǵyndarǵa arnalǵan kádýilgi qalalyq emhana bireý ǵana. Bul – №9 qalalyq emhana. Sondyqtan da esigi bir jabylmaıdy, tirkelgenderdiń de sany kóp, qaralýshylar da bir tolastamaıdy. Al dıagnostıka bólimshesi pasıentterdiń dıagnozyn anyqtaýda qarapaıym taldamalardan bastap, kúrdeli zertteýler júrgizedi. Alma Saıatqyzy – osy jumysty retteıtin, pasıentterdiń tabanynan tozbaýyna múddeli jan.
«Mamandyǵyma razy adammyn, ár syrqatqa kómektesip, olardyń alǵysyn alýdan lázzat alamyn. Qaraǵandy medınstıtýtynyń 2-kýrsynda oqyp júrgenbiz. Perzenthanaǵa praktıkaǵa baryp, alǵash sharananyń shyr etken sátin kórgendegi tolqynysym ómiri esimnen shyqqan emes. Bala shar ete qalǵanda búkil denem, jan-dúnıem sózben jetkize almaıtyn keremet kúıge endi. Mine, qýanysh, ómirge adam osylaı keledi, endeshe men gınekolog bolamyn dep sheshtim. Sol sátten bastap maqsatty túrde arnaıy akýsherlik úıirmelerge baryp, ózimdi tek soǵan daıarladym. Al biz oqyp júrgen ýaqytta jalpy emdeýden góri, arnaıy mamandyq, kásip ıesi bolýǵa qatań talaptar qoıylatyn. Sonyń barlyǵynan ótip, beske tapsyryp, akýsher-gınekolog atandym», deıdi keıipkerimiz.
Biraq Alma Saıatqyzy Qaraǵandyda eńbek jolyn bastap, óz jumysyn súıetin, kánigi mamanǵa aınalǵanda Jezqazǵan qalasyna qonys aýdarypty. Sondaǵy densaýlyq saqtaý basqarmasyndaǵylar «Bizde akýsher-gınekologter bar, al qat maman – onkogınekolog» dep ony qıyndyǵy men alǵysy mol jańa salaǵa baǵyttady.
«Baqytyma oraı Nesken Asanqyzy Beısenbaeva syndy tájirıbeli onkogınekologpen jumystas boldym. Sol kisiden kóp dúnıe úırendim. Bizde ol kezdegi medınstıtýttaǵy sabaq ta, Qaraǵandydaǵy qalalyq perzethanadaǵy jumystaǵy orta da orys tildi bolatyn. Al Jezqazǵanda ózgeshe, munda men qazaqy qarym-qatynasqa, áriptespen, pasıenttermen qazaqsha sóıleýge tóseldim. Onkogınekologtiń adam tirshiligin uzartýdaǵy jankeshtiligin bastan keshirip, 1988 jyldan bastap 2002 jylǵa deıin osy baǵytta aıanbaı eńbek ettim. О́mirlik bir mektepten óttim desem bolady. Oblys jabylǵanda ózim bir kezde bilim alǵan ordama kelip, stýdentterge sabaq berdim. Qazir sol kezde aldymnan ótken jastar – bildeı mamandar. Elordaǵa kóship kelgen soń 2008 jyldan bastap Astana qalasynda qoǵamdyq densaýlyq salasyna baǵyt buryp, qyzmetimdi shyńdadym. Osy kúnge deıin medısına salasyndaǵy jalpy eńbek qyzmetim 35 jyldy quraıdy eken. 2016 jyly «Densaýlyq saqtaý isine qosqan úlesi úshin» medalimen marapattaldym», dedi A.Saıatqyzy.
«Dáriger bolý úshin adamǵa eń bastysy ne qajet, qandaı qasıetter bolýy kerek?» degen saýalǵa keıipkerimiz: «Eń birinshi osy mamandyqqa degen úlken mahabbat bolý qajet. Sonymen qatar osy mamandyqty tańdaǵan ár dárigerde jaýapkershilik, kúızeliske qarsy turý, zeıindilik, shynshyldyq, ár naýqasqa qatysty kásibı durys sheshim qabyldaý qabileti bolý kerek. Kásibı durys sheshimniń artynda adam ómiri tur. Júz ret oılanyp, myń ret tolǵanyp, bilimińdi jetildire júrip, ár ýaqytta mıyńnyń túkpirindegi bilimiń men tájirıbeńdi basshylyqqa alyp, pasıentke kómektesý kerek. Eń bastysy osy shyǵar. Al qazirgi jumystaǵy basty mindetim – bólimniń tynysyn durys baǵytta uıymdastyrý, dáriger jáne naýqas arasyndaǵy sheshilmegen máselelerdiń sheshimin tabý ári dárigerdiń múddesin qorǵaý, sonymen qatar ákimshilik tapsyrmalardyń ýaqtyly jáne nátıjeli oryndalýyn qadaǵalaý» dep jaýap berdi.
Tájirıbeli dáriger basshylyǵymen jumys istep jatqan bólimshedegi ár esiktiń aldy bos emes eken. Alaıda tabloda janǵan nómir boıynsha kezegimen kirip, keıde oıly júzben, keıde alǵysyn aıtyp shyǵyp jatqan pasıentterge qarap oılanady ekensiń. Jabyǵyp shyqqandar jazylyp ketse, al qýanyp shyqqandar qaıta qaralyp, emhana tabaldyryǵyn attamasa deısiń.
