El Prezıdenti Qasym-Jomart Toqaev bir suhbatynda: «Biz qazaq tilin jaqsy biletin ózge ult ókilderin qoldaýymyz kerek. Olardy Parlamentke, ókiletti organdarǵa saılap, memlekettik qyzmet júıesindegi joǵary laýazymdarǵa taǵaıyndap, memlekettik nagradalarmen marapattap otyrǵanymyz durys. Mundaı azamattar qazaq tiliniń deńgeıin ultaralyq qoldanys dárejesine kóterýge kómektesedi», degen bolatyn.
Keıingi ýaqytta ózge ult ókilderi arasynda qazaq tilin úırenýge degen qulshynys jyldan-jylǵa artyp keledi. Oǵan jyl saıyn ótip kele jatqan osy aksııa dálel.
Baıqaýǵa elimizdiń 16 óńirinen quramy 22 etnos ókilderinen turatyn 326 adam qatysty. Qazylar alqasynyń saraptaýy nátıjesinde daryndylar marapattaldy. Muqaǵalıdyń «Týǵan jerge» óleńin mánerlep jatqa oqyǵan Almaty oblysy Qarasaı aýdanyndaǵy A.S.Pýshkın atyndaǵy orta mekteptiń 7-synyp oqýshysy Lýıza Sharıpova eń kóp lúpil jınap (2045), aksııanyń kósh basynan kórindi. Oqýshylarmen qatar olardyń qazaq tili muǵalimderiniń eńbekteri de eskerilip, Til saıasaty komıteti tóraǵasynyń Alǵys haty tapsyryldy.
