Vedomstvo zeınetaqy zańnamasyna jańa túzetýler ázirlenip jatpaǵanyn málim etti. Jumys berýshilerdiń 5 paıyz mólsherindegi mindetti zeınetaqy jarnalaryn (MZJ) engizý týraly normalar «Qazaqstan Respýblıkasynyń keıbir zańnamalyq aktilerine zeınetaqymen qamsyzdandyrý máseleleri boıynsha ózgerister men tolyqtyrýlar engizý týraly» 2015 jylǵy 2 tamyzdaǵy zańmen qabyldanǵan.
«Jumys berýshilerdiń mindetti zeınetaqy jarnalaryn engizýdi 2018 jylǵy 1 qańtardan bastap júzege asyrý josparlanǵan bolatyn. Alaıda mindetti áleýmettik medısınalyq saqtandyrý boıynsha jospar engizilgeli jatqanyn eskere otyryp, osy túzetýlerdi qoldanysqa engizý merzimi 2020 jylǵa aýystyryldy.
Memleket basshysynyń tapsyrmasy boıynsha 2019 jyly zańnamalyq túzetýler qabyldandy, oǵan sáıkes MZJ engizý merzimi 2023 jylǵa aýystyryldy ("Qazaqstan Respýblıkasynyń keıbir zańnamalyq aktilerine mindetti áleýmettik saqtandyrý, áleýmettik qamsyzdandyrý jáne densaýlyq saqtaý salasyndaǵy memlekettik-jekeshelik áriptestik máseleleri boıynsha ózgerister men tolyqtyrýlar engizý týraly», delingen Eńbek mınıstrliginiń jaýabynda.
Sondaı-aq mınıstrlik 2019 jyly Memleket basshysynyń tapsyrmasy boıynsha Úkimet janynan zeınetaqy júıesin odan ári damytý, onyń ishinde jumys berýshilerdiń 5 paıyzdyq mindetti zeınetaqy jarnalaryn engizý máselelerin qaraý boıynsha jumys toby qurylǵanyn aıtty. Vedomstvo málimeti boıynsha, jumys tobyna memlekettik organdardyń ókilderi, parlament depýtattary men sarapshylar kiredi.
«Jumys toby aıasynda ázirlengen usynystardy Memleket basshysy qoldady, al usynylǵan sharalardyń bir bóligi zańnamalyq deńgeıde de, is júzinde de júzege asyryldy. Mysaly, 2021 jyldan bastap zeınetaqy jınaqtarynyń bir bóligin turǵyn úı jaǵdaılaryn jaqsartýǵa, emdelýge, qarjy uıymdarynyń basqarýyna berýge maqsatty paıdalaný múmkindigi berildi. Qoldanystaǵy zańnamaǵa sáıkes jumys berýshiler MZJ-ny 2023 jyldan bastap óz qarajaty esebinen jumyskerler paıdasyna aýdaratyn bolady.
Bul halyqaralyq standarttarǵa sáıkes keletin zeınetaqy jasyna jetken kezde qazaqstandyqtardyń zeınetaqy jınaqtarynyń barabar deńgeıin (zeınetkerlikke shyqqannan keıingi tabysty aýystyrý koeffısıenti) saqtaýǵa, sondaı-aq BJZQ-nyń barlyq salymshysy zeınetaqy jınaqtarynyń bir bóligin nysanaly paıdalaný quqyǵyn iske asyrýǵa múmkindik beredi», delingen habarlamada.
Birneshe kún buryn ekonomıst Oljas Qudaıbergenov elimizdiń memlekettik organdary jumys berýshiler esebinen qosymsha 5 paıyzdyq zeınetaqy jarnalaryn engizý jónindegi josparǵa qaıta oralǵanyn jazǵan bolatyn.
