Qoǵam • 22 Maýsym, 2021

Kadrlyq rezerv eldiń damýyna kómektesedi

102 ret kórsetildi

Prezıdenttiń jastar kadrlyq rezervi jasaqtalǵanyna eki jylǵa jýyqtady. Sodan beri 300 rezervshiniń 181-i qyzmetke ornalasyp úlgergen. Onyń ishinde ortalyq memlekettik organdarǵa – 92 rezervshi, jergilikti atqarýshy organdarǵa – 40, ulttyq kompanııalarǵa – 30, ózgede jáne jeke uıymdarǵa 19 maman qyzmetke turdy. 17 adam saıası laýazymǵa taǵaıyndaldy.

Qazir Nur-Sultan qalasy ákimdiginde Apparat basshysynyń orynbasary bolyp jumys isteıtin Nurlybek Jeńisbekuly men Ekologııa, geologııa jáne tabıǵı resýrstar mınıstrliginiń Klımattyq saıasat jáne jasyl tehnologııalar departamenti dırektorynyń orynbasary qyzmetindegi Zýlfııa Súleımenova rezerv jumysyna qatysty óz oılarymen bólisken edi.

– Negizi, Prezıdenttiń kadrlyq rezervine ótkennen keıin vertıkaldy emes, parallel pozısııaǵa aýystym. Buǵan deıin Energetıka mınıstrliginde Aqparat jáne saraptamalyq júıeleý departamentinde dırektor orynbasary bolyp qyzmet ettim.

2020 jyly aqpanda Nur-Sultan qalasy ákimdigine Apparat basshysynyń orynbasary qyzmetine taǵaıyndaldym. Eki qyzmetimde de birdeı laýazym bolǵanymen, osy jumysymda mol tájirıbe jınap, túıgenim kóp boldy. Buǵan deıin Shymkent qalasynda, Túrkistan oblysynda ákimdikterde jumys istedim.

Prezıdenttiń jastar kadrlyq rezervi shyn máninde áleýeti joǵary joba dep bilemin. Memlekettik basqarý júıesinde merıtokratııanyń bolýy mańyzdy. Merıtokratııa bar jerde ádildik bolady. Al ádildik kásibı mamandardyń, kemeldengen azamattardyń memlekettik qyzmetke qyzyǵýyna, kelýine jol ashady. Bul kóp áriptesterimizge múmkindik berdi, – deıdi Nurlybek Jeńisbekuly.

Sonymen qosa maman memlekettik basqarý júıesindegi kóp stereotıpti buzdy degen pikirde. Nurlybek Jeńisbekulynyń aıtýynsha, qazir tanys arqyly jumysqa turý, qyzmetke ornalasý kezinde jershildik pen rýshyldyq mańyzdy degen eski oılardyń qalybyn buzdy.

– Sondyqtan bul joba jalǵasyn tabý kerek degen pikirdemin. Áleýmettik baspaldaq júıeli jumys istese ádiletti qoǵamnyń qalyptasýyna yqpal etedi. Ekinshiden, memlekettik qyzmetshi ımıdjine jańa lep berdi. Buryn azamattar basqa sharýanyń basyn shalyp, túrli kásipti kórip, úlken jetistikke jete almaı, memlekettik qyzmetke keletin. Memleket aı saıyn turaqty jalaqysyn berip otyrady dep túsindi. Iаǵnı sońǵy aıaldama retinde kóretinder kóbeıdi. Al atalǵan joba qısynsyz pikirdi joqqa shyǵardy. Bul jerde ıdeologııa máselesi de bar, – deıdi Nurlybek Jeńisbekuly.

Búginde memlekettik qyzmette eńbek etip júrgen Nurlybek Jeńisbekuly sheshim qabyldap, jaýapkershilik ala alatyn, boıynda qýaty, oıynda shýaǵy bar jastardyń memlekettik qyzmetke kóptep tartylýy quptarlyq dep túıindedi.

Taǵy bir rezervshi, Ekologııa, geologııa jáne tabıǵı resýrstar mınıstrliginiń Klımattyq saıasat jáne jasyl tehnologııalar departamenti dırektorynyń orynbasary bolyp qyzmetke turǵan Zýlfııa Súleımenova bul joba tek qyzmette ósý emes, el damýyna úles qosýǵa múmkindik degen pikirde.

– Qyzmettegi negizgi maqsatym – Qazaqstannyń klımattyq saıasatyn jaqsartý. Bárimiz estip, bilip júrgendeı, ekologııa máseleleri dúnıe júzi boıynsha ózekti. Bul beıjaı qaraıtyn jaıt emes. Klımat máseleleri ekonomıka jáne áleýmetpen tyǵyz baılanysty. Jaqynda Eýropalyq odaq parnıktik gazdardyń shyǵaryndylaryna shekaralyq salyq engizýdi qarastyra bastady. Eger bul saıasat júzege assa, ekonomıkamyzǵa áser etedi, al ol áleýmetke de oń áser etetini sózsiz. Meniń basty maqsatym – klımat máseleleri boıynsha taldaýdy nyǵaıtý, sonymen birge jańa ári durys ekologııalyq saıasat qalyptastyrýǵa atsalysý. Bizge eń bastysy halyqtyń ómir sapasyn arttyratyn saıasat qajet, – deıdi ol.

Jalpy, Memleket basshysy aıtqandaı, jastar kadrlyq rezerviniń negizgi maqsaty memlekettik qyzmet salasynda tranzaksııalyq lıder emes, transformasııalyq lıderler qalyptastyrý. Zýlfııa endigi kezekte qalyptasyp jatqan transformasııany júzege asyrýǵa múmkindik berilse degen oıyn da jetkizdi.

– Memlekettik qyzmetke kelgeli de júıeni ońtaılandyrýǵa qatysty biraz oı qalyptastyryp úlgerdim. Alda solardy júzege asyra alamyn degen oıdamyn, buǵan deıingi tájirıbemdi, bilimimdi paıdaǵa jaratamyn dep senemin. Memlekettik qyzmettiń basty maqsaty – elimizde ústemdik etetin durys zań men saıasat qalyptastyrý, adamdarǵa ózderiniń múmkindikterin júzege asyra alatyn jaǵdaı jasaý. Sol turǵydan qaraǵanda, ózimniń oqyǵanymdy, tájirıbemdi tıimdi qoldana alamyn degen nıettemin, deıdi jas maman.

Sońǵy jańalyqtar

Jyl sózi

Álem • Búgin, 20:36

Energetıka – ekonomıka draıveri

Ekonomıka • Búgin, 20:31

Quldyramaıtyn qundylyq

Tanym • Búgin, 20:20

Birjaqty baılam hám batyl baǵdar

Pikir • Búgin, 20:08

Birde-bir shaǵym eskerýsiz qalmaıdy

Qazaqstan • Búgin, 19:55

Býrkına-Faso astanasynda oq atyldy

Álem • Búgin, 19:17

Almatynyń ońtústiginde jer silkindi

Aımaqtar • Búgin, 17:38

Almatyda qurylys krany qulady

Oqıǵa • Búgin, 14:21

Aýǵanstanda jarylys boldy

Álem • Búgin, 12:21

Álemdegi eń úlken muzdyq erip ketti

Ekologııa • Búgin, 11:05

Uqsas jańalyqtar