Almatynyń Bas sanıtarlyq dárigeri Jandarbek Bekshın qalada aınalymdaǵy 90%-ǵa jýyq mýtasııalanǵan shtammdardyń taralýyna baılanysty qaladaǵy epıdemıologııalyq jaǵdaı kúrdeli ekenin aıtty.
«12-19 maýsym aralyǵynda mýtasııalanǵan shtammdardyń aınalymyn anyqtaý maqsatynda PTR-dıagnostıkasyn júrgizdik. 53 zertteýdiń ishinen «brıtandyq shtamm» 44-te (83%), «ońtústikafrıkalyq» eki jaǵdaıda (4%) jáne bireýinde «nıý-ıorktik» (1,8%) anyqtaldy. Qalǵan 11%-da COVID-19 vırýsynyń mýtasııasy anyqtalmady», dedi J. Bekshın.
Sanıtarlyq-epıdemıologııalyq mekeme basshysynyń aıtýynsha, 16 maýsymnan bastap juqtyrý kórsetkishi 0,7-den 0,96-ǵa deıin ósken.
«Bul demalys oryndaryna barýmen turǵyndardyń betperde rejımin saqtaý boıynsha epıdemııaǵa qarsy sharalardy elemeýi saldarynan boldy», dedi J. Bekshın.
Sondaı-aq COVID-19 aýrýynyń ósýiniń negizgi sebebi ınfeksııanyń tez taralýyna yqpal etetin mýtasııalanǵan shtamdardyń paıda bolýymen de baılanysty.
Sondyqtan 22 maýsymda epıdemııalyq jaǵdaıdy baǵalaý matrısasynda Almaty taǵy da «sary» aımaqqa ótti. Juqtyrý kórsetkishi joǵary.
Jandarbek Bekshın epıdemıologııalyq jaǵdaı ýshyqqan jaǵdaıda shekteý sharalaryn baqylaý 5 kún ishinde júrgiziletinin túsindirdi («jasyl» aımaqtan «saryǵa» nemese «sary» aımaqtan «qyzylǵa» kóshý). Sondyqtan Almatyda «jasyl» aımaq rejımi taǵy 5 kún, ıaǵnı 27 maýsymǵa deıin saqtalady.
ALMATY
