EL AZAMATTARYNA ESKERTKISh TURǴYZYLDY

Memleket basshysy Nursultan Nazarbaev Jeńistiń 65 jyldy­ǵyn elimizdiń barlyq óńirinde laıyqty deńgeıde atap ótýdi tapsyrǵan bolatyn. Elbasynyń aıtýynsha, birde-bir soǵys ardageri, olardyń jesirleri jáne tyl eńbekkerleri ózderin memleket nazarynan tys qalyp, umytylǵan jandaı sezinbeýi tıis.

Jýyrda Almaty oblysynyń Jambyl aýdanyndaǵy Besmoınaq eldi mekeninde 220 adamnyń esimi jazylǵan mármár tastan jasal­ǵan monýmenttiń ashylý saltanaty boldy. El azamattaryn el esinde qal­dyrý maqsatynda turǵyzylǵan monýmenttiń bıiktigi – 7 metr. Al ortada máńgilik alaý janyp tur. Mundaı ıgi isti “bolashaqqa – baǵdar, urpaqqa ónege” dep sanaıtyn aýyl azamattary “bir jaǵa­dan bas, bir jeńnen qol shyǵaryp”, onyń boı kóterýine atsalysty. Monýmenttiń eki jaǵynda soǵysqa qatysqan, qýǵyn-súrginge ushyraǵan, Eńbek Eri atanǵan jergilikti jalpy sany 220 adamnyń esimi jazylǵan. Onyń 205-i – soǵys ardageri, 13-i – zul­mat zaman­da qýǵyn-súrginge ushyraǵandar, 2-ýi – Eńbek Eri. Soǵys­­tan aman-esen oralǵan 76 ardagerdiń búginde úsheýiniń ǵana kózi tiri. – Jergilikti mektepti 20 jyl basqarǵan Tilegen Jaqypbaıuly aǵamyzdyń eskertkishti turǵyzýda kómegi zor boldy. Ol kisiden barlyq derekterdi alyp, el azamattarynyń esimin tolyq jazyp qoıdyq. Monýment meshittiń aýlasyna turǵyzylǵandyqtan, eskertkish taqtaǵa: “Alla taǵalanyń úıi – meshitte qaıtys bolǵandardyń árýaǵyna duǵa jasalsyn, keler kúnnen ár azamat óz otbasyna, halqyna jaqsylyq tilegeı!” – dep jazdyrttym. “Álemniń jaryǵyn syılaǵan – Ana!”, “Ár kúngi bitken is – keleshek tarıh!”, “О́lige ıman, tirige bereke bersin!” – degen sózder de jazýly. Osyndaı ıgi istiń júzege asýyna aýdan azamaty, belgili jazýshy Naǵashybek Qapalbekulynyń, aýyl aqsaqaldar alqasynyń tóraǵasy Nurmanbet Amanjolulynyń úlesi bar. Meshitke kelgen ımandy jastarymyzdyń boıynda Otandy súıýge degen sezim arta bersin, – deıdi eskertkishtiń negizgi aýyrtpalyǵyn kóterip, jeke qarjysyna turǵyzǵan aýyl azamaty Muhtar Jýarov. Eskertkishtiń ashylý saltanatynda ótkenge salaýat aıtylyp, qurbandardyń rýhyna quran baǵyshtaldy. Aǵabek QONARBAIULY. Almaty oblysy.