«Lesnaıa pesnıa» atty kitap-ıllıýstrasııalyq kórmesindegi materıaldar Belarýs Respýblıkasynyń Ulttyq kitaphanasy men Belarýs Ulttyq muraǵattarynyń qorlarynan alynǵan. Sondaı-aq «Orman ánderi» jazylǵan bannerler men Belarýs partızandarynyń qozǵalysy jáne uıymdasqan qarýly kúrestiń maqsattary týraly naqty málimetter kórsetildi. Qoljazba jýrnaldary, áskerı operasııalardyń kartalary men syzbalary, partızan mektepterindegi balalardyń qolynan shyqqan erekshe jumystary da qoıyldy.
Qazaqstandyq maıdanger-jazýshy, aqyn, jýrnalısterdiń sany toqsannan asady. Máselen, B.Momyshuly, D.Snegın, D.Ábilev, J.Saın, K.Toqaev, Q.Ábdiqadyrov, V.Chýgýnov, M.Abdýllın, Q.Amanjolov, A.Jumaǵalıev, B.Bulqyshev, J.Moldaǵalıev, S.Máýlenov, M.Ǵabdýllın, P.Kýznesov, I.Adambekov, A.Ismambetov, H.Erǵalıev, Á.Sháripov, Q.Qaısenov jáne basqalary bar.
Soǵys taqyrybyna ólsheýsiz úles qosqan qazaqstandyq avtorlardyń arasynda Kemel Toqaev shyǵarmalarynyń orny erekshe. Jazýshy Uly Otan soǵysynyń ardageri, I jáne II dárejeli «Otan soǵysy» ordenderiniń ıegeri, Stalıngrad, Ýkraına, Belarýs jáne Polshada ótken shaıqastarǵa qatysqan. Kóptegen áskerı oqıǵanyń tikeleı qatysýshysy retinde keıipkerlerdiń bolmysyn, sezimderin dál ári sheber sýretteı aldy.
Osyǵan oraı Ulttyq akademııalyq kitaphanada qazaq detektıv janrynyń kórnekti ókili Kemel Toqaev atyndaǵy shyǵarmashylyq zaly ashyldy. Mundaǵy maqsat – jastardy adaldyqqa, erlikke, otansúıgishtikke baýlý, maıdangerlerge qurmet kórsetýge, detektıvtik janrdaǵy shyǵarmalardy oqýǵa oqyrmandardyń qyzyǵýshylyǵyn oıatý. О́z ýaqytynda kitaptary júz myń danamen oqyrmanǵa jol tartqan qalamgerdiń rýhanı murasy keıingi urpaq boıyndaǵy patrıottyq sezimin oıatýǵa óz septigin tıgizeri sózsiz.
Zalda Kemel Toqaevtyń kitaptary, álemdik jáne qazaqstandyq detektıv janryndaǵy úzdik týyndylar, Uly Otan soǵysy týraly jazylǵan shyǵarmalar, sol kezeńdegi jarııalanǵan maqalalar, hattar, merzimdi basylymdar, aýdıo-beınematerıaldar, soǵys taqyrybyndaǵy eksponattar usynylǵan.
Aıta keteıik, Ulttyq akademııalyq kitaphana elimizdiń belgili aqyn-jazýshylary men qoǵam qaıratkerleri atyndaǵy oqý zaldarynyń bolýymen erekshelenedi. Atap aıtsaq, «Abaı» akademııalyq oqý zaly, «Qundy tartý» zaly, jazýshy Ábish Kekilbaev oqý zaly, «Myrzataı Joldasbekovtiń memorıaldyq kitap kolleksııasy» oqý zaly, Dúkenbaı Dosjan atyndaǵy «Jazýshy» zaly, akademık Keńes Nurpeıisulynyń «Ǵylym» zaly, «Ákim Tarazı» oqý zaly, Tursynbek Kákishev atyndaǵy «Ǵalym» oqý zaly, túrkolog ǵalymdar Beısenbaı Kenjebaev pen Nemat Kelimbetov atyndaǵy «Túrkologııa» oqý zaly, jazýshy Qajyǵalı Muqambetqalıulynyń oqý zaly, qoǵam qaıratkeri Qýanysh Sultanulynyń jeke kitaphanasynan «Rýhanı jańǵyrý» zaly, Balalar kitaphanasynyń oqý zaly. Odan basqa Zákı Ahmetov, Hamıt Erǵalıev, Halıfa Altaı, Hasen Oraltaıdyń jeke kitaphanalary oqyrman suranysyna ıe.
Kezdesý TMD elderi elshilikteriniń, memlekettik organdar, shyǵarmashylyq zııaly qaýym ókilderiniń, sondaı-aq buqaralyq aqparat quraldarynyń qatysýymen onlaın formatta ótti.
Is-sharany Ulttyq akademııalyq kitaphana, Belarýs Respýblıkasynyń elshiligimen jáne Belarýs Respýblıkasynyń Ulttyq kitaphanasymen birlesip uıymdastyrdy.
