Qazaqstan • 24 Maýsym, 2021

«URKER-2021» Ulttyq báıgesiniń jeńimpazdary marapattaldy

«Qazmedıa» ortalyǵynda baspa, radıo, ınternet-jýrnalıstıka salasyndaǵy «URKER-2021» ulttyq báıgesiniń jeńimpazdaryn marapattaý rásimi ótti, dep habarlaıdy Egemen.kz.

Janbolat Kenjeǵul

2021 jyly uıymdastyrýshylardyń mekenjaıyna respýblıkalyq jáne óńirlik radıostansııalardan, baspa jáne ınternet-basylymdardan 340 ótinim kelip tústi. 2017 jyldan bastap barlyǵy 2 833 jumys Syılyqqa usynyldy, onyń 248-i short-paraqqa endi. Otandyq buqaralyq aqparat quraldarynyń 67 úzdik ókili «URKER» estelik músinshesiniń ıegeri atandy.

QR Aqparat jáne qoǵamdyq damý mınıstri Aıda Balaeva saltanatty sharanyń bastalý rásiminde jýrnalısterdiń eńbegine alǵysyn bildirip, «Aqparat keńistiginiń qoǵam damýyndaǵy alatyn orny da, qosatyn úlesi de óte zor. Sebebi Medıa tek resmı aqparat taratýdyń quraly emes, ulttyq qaýipsizdik pen memlekettik ıdeologııanyń ózegi ekenin únemi aıtyp kelemiz. Azamattyq qoǵamnyń qarqyndy damýy jýrnalısterdiń kásibı jáne azamattyq belsendigine tyǵyz baılanysty», - dedi.

Sonymen birge Aıda Balaeva bıyl «Táýelsizdiktiń 30 jyldyǵyna arnalǵan úzdik materıal» arnaıy nomınasııasynyń qosylǵanyn atady. Bul nomınasııasynyń jeńimpazy «Semeı tańy» gazetiniń jýrnalısti Ryıza Moldasheva atandy.

Oǵan qosa otandyq radıonyń 100 jyldyǵyna oraı taǵaıyndalǵan arnaıy júldeniń ıegeri «Qazaq radiosy» atandy.

Saltanatty rásimde nomınasııalar boıynsha jýrnalıstıka salasyndaǵy bedeldi Syılyq jeńimpazdarynyń esimderi ataldy:

Jyldyń úzdik fotosýreti - Maqsat Shaǵyrbaev newsroom.kz portaly

Jyldyń úzdik reportajy - Anýar Abdrahmanov BaigeNews.kz portaly

Jyldyń úzdik analıtıkalyq materıaly - Dına Imambaeva «Aqıqat» jýrnaly

Jyldyń úzdik jýrnalıstik zertteýi - Rysbek Qydyrbek «Aiqyn» gazeti

Jyldyń úzdik suhbaty - Tamara Vaal Vlast.kz portaly

Jyldyń úzdik tanymdyq materıaly - О́mirbek Sansyzbaev Massaget.kz portaly

Radıostansııadaǵy úzdik joba - «Novoe ýtro» «NS» radıosy

Jyldyń úzdik jańalyqtar portaly - inform.kz

Jyldyń úzdik gazeti - «TÚRKISTAN»

Jyldyń úzdik jýrnaly - «Forbes Kazakhstan»

Táýelsizdiktiń 30 jyldyǵyna arnalǵan úzdik materıal - Ryıza Moldasheva «Semeı tańy» gazeti.

Fınalısterge Ulttyq báıge jeńimpazy ataǵynda kýálik, «URKER» estelik músinshesi jáne bir mıllıon teńge mólsherindegi qarjylaı syılyq tabystaldy.

Kórermender marapattaý rásimin syılyqtyń urker-awards.kz resmı saıtynda tikeleı efırde kórýge múmkindik aldy.

Aıta keteıik, Qazaqstandyq «URKER» Ulttyq syılyǵy, baspa, radıo, ınternet-jýrnalıstıka salasyndaǵy jetistikteri úshin beriletin talantty jýrnalıster men shyǵarmashylyq ujymdardy anyqtaý, olardyń kásibı jýrnalıstıkanyń damýyna qosqan úlesterin taný maqsatynda 2017 jyly qurylǵan.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz