Qaraly habardy alǵash bolyp prodıýser Gúlzıra Aıdarbekova áleýmettik jelidegi paraqshasynda rastady. Ol marqumnyń «sińlisindeı jaqyn adam» bolǵanyn aıtyp, kóńil aıtty.
Keıin Halyqstan arnasy blogerdiń Almatydaǵy plastıkalyq hırýrgııa klınıkalarynyń birinde kóz jumǵan bolýy múmkin ekenin habarlady. Málimetterge sáıkes, áıeldiń jaǵdaıy operasııa bastalmaı turyp nasharlaǵan. Sonymen qatar 2GIS platformasynda qoldanýshylar abdomınoplastıka kezinde áıeldiń qaıtys bolǵany týraly pikirler qaldyrǵan. Alaıda bul aqparat resmı túrde rastalǵan joq.
Budan keıin Threads jelisinde marqumnyń qyzy jazba jarııalap, 53 jastaǵy Sáýle Ermahanovanyń 15 mamyr kúni Almatydaǵy jekemenshik klınıkada jergilikti anestezııamen jasalǵan josparly lıposaksııa barysynda qaıtys bolǵanyn málimdedi.
Týystarynyń aıtýynsha, dárigerler operasııa eń kóbi bir jarym saǵatqa sozylatynyn aıtqan. Alaıda birneshe saǵat boıy jaqyndaryna pasıenttiń jaǵdaıy týraly naqty aqparat berilmegen.
Marqumnyń týystary jedel járdemniń ne sebepti kesh shaqyrylǵanyn jáne áıeldiń ómirin saqtap qalý úshin qandaı sharalar qabyldanǵanyn anyqtaýdy talap etip otyr. Olardyń sózinshe, qaıǵyly jaǵdaıdan keıin de klınıka jumysyn jalǵastyrǵan.
Keıin Almatydaǵy Smart Beauty Clinic resmı málimdeme jasap, qazirgi ýaqytta pasıent qabyldaý ýaqytsha toqtatylǵanyn habarlady.
«Qazirgi ýaqytta bolǵan jaǵdaıǵa baılanysty zańnamada kózdelgen barlyq rásimder júrgizilip jatyr. Dárigerlik qupııany saqtaý, pasıenttiń otbasyna qurmetpen qaraý jáne tergeýdiń obektıvtiligi maqsatynda resmı prosedýralar aıaqtalǵanǵa deıin oqıǵanyń mán-jaıy men medısınalyq derekterge qatysty túsinikteme bermeımiz», delingen klınıka habarlamasynda.
Almaty qalalyq polısııa departamenti atalǵan fakti boıynsha Bostandyq aýdandyq polısııa basqarmasy qylmystyq is qozǵaǵanyn málimdedi.
Sonymen qatar áleýmettik jelilerde dál osy klınıkada bes jyl buryn da osyndaı operasııa kezinde áıel adamnyń qaıtys bolǵany, sol oqıǵadan keıin mekemeniń jabylyp, keıin basqa ataýmen qaıta jumysyn jalǵastyrǵany týraly aqparat tarady. Alaıda bul málimetter ázirge resmı túrde rastalǵan joq.
Osyǵan baılanysty redaksııa tilshisi kosmetologııalyq jáne plastıkalyq hırýrgııa qyzmetin kórsetetin klınıkalardyń lısenzııasyn Densaýlyq saqtaý mınıstrligi qanshalyqty baqylap, tekseretini jóninde resmı saýal joldady.
Densaýlyq saqtaý mınıstrligi atalǵan jaǵdaı mınıstrdiń erekshe baqylaýyna alynǵanyn habarlady.
«Densaýlyq saqtaý mınıstriniń tapsyrmasy boıynsha beıindi mamandar men aýmaqtyq departamentterdiń qatysýymen jan-jaqty tekserý júrgiziledi. Medısınalyq qyzmetti júzege asyrýǵa lısenzııanyń bolýy, kórsetiletin qyzmetterdiń qoldanystaǵy standarttarǵa sáıkestigi, medısına qyzmetkerleriniń biliktiligi, sondaı-aq shuǵyl medısınalyq kómek kórsetý standarttary men hattamalarynyń saqtalýy zerdelenedi», dep málimdedi mınıstrlik.
Vedomstvo ınvazııalyq kosmetologııalyq prosedýralar medısınalyq aralasýǵa jatatynyn jáne mundaı qyzmetter tek lısenzııasy bar medısınalyq uıymdarda bilikti mamandardyń qatysýymen júrgizilýi tıis ekenin eske saldy.
«Tekserý qorytyndysy boıynsha zańbuzýshylyqtar anyqtalǵan jaǵdaıda materıaldar quqyq qorǵaý organdaryna joldanyp, Qazaqstan Respýblıkasynyń zańnamasyna sáıkes tıisti sharalar qabyldanady», delingen mınıstrlik jaýabynda.
Sondaı-aq mınıstrlik kosmetologııalyq qyzmet kórsetetin uıymdarǵa júrgiziletin monıtorıng kúsheıtiletinin atap ótti. Vedomstvo pasıentterdiń qaýipsizdigine, medısınalyq standarttardyń saqtalýyna jáne ruqsat qujattarynyń bolýyna erekshe nazar aýdarylatynyn málimdedi.
