Foto: Ashyq derekkóz
Vedomstvonyń málimetinshe, Germanııa tarapy ekstradısııadan bas tartý sebebin túsindirmegen. Soǵan qaramastan, Dúısenovke qatysty halyqaralyq izdeý toqtatylmaǵan jáne qylmystyq qýdalaý jalǵasyp jatyr.
«Germanııa tarapy ony berý týraly ótinishti qanaǵattandyrmady. Alaıda izdeý sharalary toqtatylǵan joq. Qazirgi ýaqytta is boıynsha mán-jaıdy anyqtaýǵa baǵyttalǵan jumystar júrgizilip jatyr, sonyń ishinde sheteldik quzyrly organdarmen ózara is-qımyl jasalýda», dep habarlady Bas prokýratýra.
Tergeý múddesine baılanysty ózge aqparat jarııalanbaıtyny aıtyldy.
Maqsat Dúısenov 2018 jyldyń tamyzynan 2019 jyldyń sáýirine deıin Bas kólik prokýrory qyzmetin atqarǵan. Ol byltyr 29 tamyzda halyqaralyq izdeýge jarııalanǵan. Keıin Germanııanyń quqyq qorǵaý organdary Interpol jelisi arqyly halyqaralyq yntymaqtastyq aıasynda qamaýǵa alǵany belgili boldy.
2025 jyldyń qazan aıynda Dúısenovtiń Germanııadan Qazaqstanǵa ekstradısııalanatyny habarlanǵan edi. Alaıda keıbir buqaralyq aqparat quraldary onyń saıası baspana suraýy múmkin ekenin jazǵan.
Sol kezde Bas prokýrordyń orynbasary Ǵalymjan Qoıgeldıev ekstradısııa prosesi bastalǵanyn málimdegen bolatyn.
«Ekstradısııa prosesi iske qosyldy. Germanııa tarapynan bas tartý bolǵan joq. Qazirgi ýaqytta ony elge qaıtarý baǵytynda jumys júrgizilip jatyr», degen edi ol.
Aıta keteıik, Qazaqstan men Makao ekstradısııa týraly kelisimge qol qoıdy.
Bas prokýratýra birneshe márte kólik satamyn dep halyqty aldaǵan el azamatyn qylmystyq jaýapkershilikke tartý maqsatynda Reseı Federasııasy aýmaǵynan ekstradısııalady.
Sondaı-aq 230 myń dollar jymqyrǵan býhgalter Grekııadan ekstradısııalandy.
