Abaı atyndaǵy Qazaq ulttyq pedagogıkalyq ýnıversıtetinde «Qazaqstannyń Táýelsizdigi jáne rýhanı-mádenı qundylyqtar» taqyrybynda ótken halyqaralyq onlaın ǵylymı-praktıkalyq konferensııada mádenı-rýhanı saladaǵy qol jetken jetistikter men oryn alǵan olqylyqtar jan-jaqty talqylandy.
Konferensııaǵa Fılologııa jáne kóptildi bilim berý ınstıtýtynyń dırektory, fılologııa ǵylymdarynyń doktory, professor Alýa Tańjaryqova moderatorlyq etti. Jıyndy ashqan ýnıversıtet rektory Darhan Bilıalov kún tártibindegi máseleniń ózektiligine toqtaldy.
Aqyn, Qazaqstannyń Eńbek Eri Oljas Súıleımenov Táýelsizdiktiń 30 jyly el úshin úlken tarıhı kezeń bolǵanyn atap kórsetti. «Biraq buǵan deıingi tarıhymyz Reseı ımperııasynyń solaqaı saıasatyna baılanysty burmalanyp keldi. Al ózimizde ol zamandarda jylnamashy bolmaǵandyqtan, kóp nárseni dáleldeı almaı qaldyq. Sondyqtan zor múmkindik týyp turǵan qazirgi tańda tarıhymyzdy túgendeýimiz kerek», dedi aqyn. Sonymen qatar «Semeı-Nevada» antııadrolyq qozǵalysy arqyly Semeı jerindegi ıadrolyq synaqtar toqtatylyp, polıgonnyń jabylýy da Táýelsizdik tarıhynyń jarqyn betteri ekenin aıtty.
Qazaqtyń tuńǵysh ǵaryshkeri, Keńes Odaǵynyń Batyry Toqtar Áýbákirov Oljas Súleımenovtiń oılaryn jalǵastyra kele, el tarıhynyń áli kúnge jaltaqtap otyrǵanyna ókinish bildirdi. «О́zimiz istegen zor isterdi ózimiz aıta almasaq, kim aıtady? Qazaq qazaq bolǵaly myń jyldan asty. Tarıhy túzý eldiń eńsesi de bıik bolady», dedi ushqysh.
Sondaı-aq Qazaqstannyń Rýmynııadaǵy Tótenshe jáne ókiletti elshisi Nurbah Rústemov el Táýelsizdigi jyldaryndaǵy Qazaqstannyń halyqaralyq qatynastardaǵy tabystary týraly aıtty. Al M.Áýezov atyndaǵy Ádebıet jáne óner ınstıtýtynyń dırektory, fılologııa ǵylymdarynyń doktory Kenjehan Matyjanov otyz jyldaǵy qazaq ádebıetiniń damý tendesııalaryna toqtaldy.
Aýqymdy is-sharaǵa Ulttyq ǵylym akademııasynyń prezıdenti, akademık Murat Jurynov, Q.Tynystanov atyndaǵy Ystyqkól memlekettik ýnıversıtetiniń rektory Asqar Imanbaev, Tuńǵysh Prezıdent – Elbasy kitaphanasynyń arnaıy jobalar qyzmetiniń basshysy Ersultan Bekturǵanov, Mońǵolııa-Qazaqstan dostyǵy jáne yntymaqtastyq odaǵynyń tóraǵasy Bákeı Aǵyparuly, Koreıa Respýblıkasynyń Qazaqstandaǵy elshiligi janyndaǵy Bilim berý ortalyǵynyń dırektory Kım Tehvan, Eýrazııa ekonomıkalyq komıssııasynyń Energetıka jáne ınfraqurylym jónindegi alqa múshesi Taıyr Mansurov, Halyqaralyq «TÚRKSOI» Túrki mádenıeti uıymynyń bas hatshysy Dúısen Qaseıinov qatysyp, Táýelsizdiktiń 30 jyly eldiń mádenı-rýhanı damýynyń aıtýly kezeńi bolǵanyn atap ótti.
