Memleket basshysy Qazaqstan halqynyń jáne jeke óziniń atynan Nıkol Pashınıandy ózi basqaratyn «Grajdanskıı dogovor» partııasynyń kezekten tys ótken Parlament saılaýyndaǵy jeńisimen quttyqtady.
«Daýys berý qorytyndysy memlekettilikti, ulttyq birlikti nyǵaıtýǵa jáne eldegi ahýaldy turaqtandyrýǵa baǵyttalǵan Sizdiń saıası ustanymyńyzdy halyq qoldaıtynyn aıqyn kórsetti», delingen jedelhatta.
Prezıdent birlesken belsendi kúsh-jigerdiń arqasynda Qazaqstan men Armenııa arasyndaǵy qarym-qatynastar ekijaqty formatta da, Eýrazııalyq keńistiktegi ekonomıkalyq ıntegrasııa aıasynda da nyǵaıa beretinine senim bildirdi.
Qasym-Jomart Toqaev Nıkol Pashınıannyń dostas Armenııany órkendetý jolyndaǵy asa jaýapty memlekettik qyzmetine mol tabys tiledi.
