Lısenzııa berý úshin kompanııalardyń aksıonerleri men menedjmentine, onyń ishinde jetkilikti biliktiliginiń bolýyna jáne sottylyǵynyń bolmaýyna qatań talaptar qoıylmaq. Qarjy naryǵyn retteý jáne damytý agenttiginiń habarlaýynsha, qazirgi kezde 3 659 mıkronesıe uıymy: 1 761 lombard, 1 222 nesıe seriktestigi, 676 mıkroqarjy uıymy, onyń ishinde 7 onlaın-kredıtteý kompanııasy taratylǵaly jatyr.
«Mıkrokredıtteýdiń shekten tys ósýin shekteý jáne qaryz alýshylardyń quqyqtaryn qorǵaý maqsatynda syıaqy mólsherlemesiniń shekti mólsherlemeleri jáne borysh júktemesiniń koeffısıenti engizildi, mıkroqarjy uıymdary kapıtalynyń eń tómen mólsheri boıynsha prýdensııalyq standarttar kóterildi. Jumys istep turǵan sýbektiler úshin kapıtaldardyń eń tómen mánderin 2023 jylǵa deıin kezeń-kezeńimen mıkroqarjy uıymy úshin 30 mln teńgeden 100 mln teńgege deıin, nesıe seriktestikteri úshin 10 mln teńgeden 50 mln teńgege deıin, lombardtar úshin 10 mln teńgeden 70 mln teńgege deıin kóterý kózdeledi. Bul rette jańadan qurylatyn uıymdar jarǵylyq jáne menshikti kapıtaldy kóterilgen eń tómen mánder deńgeıinde qalyptastyrýǵa tıis» delingen agenttik habarlamasynda.
Kásipkerlerge mıkronesıe berýdi arttyrý úshin shalǵaı aýdandarda «Bastaý Bıznes» jobasynyń túlekterin nesıeleý belsendi júrgizilmek. Ol úshin «Atameken» ulttyq kásipkerler palatasynyń bas bolýymen 15 jańa mıkroqarjy uıymy qurylǵan.
Sondaı-aq mıkroqarjy naryǵy sýbektileriniń aıqyndylyǵy men tártibin arttyrý, mıkroqarjy uıymdary úshin talaptardy qatańdatý jáne qosymsha shekteýler engizý úshin 2021 jylǵy mamyrda banktik, mıkroqarjylyq jáne kollektorlyq qyzmetti retteý týraly zań kúshine engeni belgili. Zań aıasynda merzimi ótken bereshek máselesi qarastyrylyp, problemalyq bereshekti retteýdiń barlyq prosesi eki ese – 180 kúnnen 90 kúnge deıin qysqarady. Sonymen qatar zańda jarnamany taratý jáne ornalastyrý kezinde mıkroqarjy uıymynyń jyldyq tıimdi syıaqy mólsherlemesin (JTSM) kórsetýi de mindettelgen. Bul tutynýshylarǵa bastapqy kezeńde alǵan qaryzdardy eskere otyryp, óz múmkindikterin obektıvti baǵalaýǵa jáne bolashaqta qaryzdardy óteý kezinde qıyndyqtardy boldyrmaýǵa múmkindik beredi. Sonymen qatar mıkrokredıt berý shartynyń mazmunyna, resimdelýine jáne mindetti sharttaryna qoıylatyn talaptar belgilengen.
«Mıkrokredıtterdi qashyqtan berý formatyn taratý jaǵdaıynda ınternet-alaıaqtyq faktileri baıqaldy. Jalǵan kredıtter alý úshin azamattardyń jeke derekterin zańsyz alýmen baılanysty qarjylyq alaıaqtyqqa qarsy is-qımyl úshin agenttik klıentterdi ıdentıfıkattaý talaptaryn kúsheıtti. Ol úshin bıyl 30 sáýirde agenttik elektrondy tásilmen mıkrokredıtter berý kezinde klıentterdi ıdentıfıkattaýdyń barlyq mıkroqarjy uıymdary úshin mindetti jańa tártibin qabyldady. Jańa talaptarǵa sáıkes endi klıentti sáıkestendirý úshin úsh tásildiń birin paıdalaný kózdelgen: ulttyq kýálandyrýshy ortalyq usynǵan elektrondy sıfrlyq qoltańba, Ulttyq banktiń BEAO SDAO qyzmetterin paıdalaný arqyly bıometrııalyq ıdentıfıkattaý nemese eki faktorly birdeılendirý. Klıentke ıdentıfıkattaý júrgizbeı mıkrokredıtter berýge tyıym salynady» delingen habarlamada.
Aldaǵy ýaqytta alaıaqtardyń jalǵan nesıe rásimdep jiberýiniń aldyn alý maqsatynda agenttik quqyq qorǵaý organdarymen birlese áreket etýge múddeli bolyp otyr.
