Kolýmbııa prezıdentiniń tikushaǵyna shabýyl jasaǵandar týraly aqparat úshin úsh mıllıard peso (796 000 AQSh dollary, 573 000 fýnt sterlıng) syıaqy usyndy.
Ivan Dýke juma kúni tikushaqqa oq jaýdyrǵan kezde Venesýela shekarasyna jaqyn jerdegi Kýkýt áýejaıyna jaqyndap qalǵan. Keıinirek jarııalanǵan fotosýretterde tikushaqtyń tirek burandasy men art jaǵyna oq tıgeni kórinedi. Borttaǵy adamdardyń eshqaısysy zardap shekken joq. Birikken Ulttar Uıymy, EO men AQSh bul shabýyldy aıyptady.
Bortta bolǵan eldiń qorǵanys mınıstri Dıego Molano senbide qylmyskerler týraly kez kelgen aqparat úshin syıaqy usyndy. Al Ulttyq polısııa Kýkýta aımaǵynda AK-47 jáne 7,62 kalıbrli eki myltyq tabylǵanyn málimdedi. Olar shabýyl kezinde qoldanylǵan. Ulttyq polısııa bastyǵy general Horhe Vargas 7,62 kalıbrli myltyqta Venesýela Qarýly Kúshteriniń belgileri boldy dedi. «Biz kinálilerdi izdep jatyrmyz. Olardy qolǵa túsirmeıinshe toqtamaımyz», dep jazdy ol óziniń Twitter-degi paraqshasynda.
Bul shabýyldy kim jasaǵany áli belgisiz. Oqıǵaǵa deıin Dýke Katatýmbo aımaǵyndaǵy is-sharaǵa qatysqan. Bul aımaq Kolýmbııa – Venesýela shekarasy arqyly ótedi jáne kokaın quramyndaǵy basty zat – koka ósiretin negizgi aımaqtardyń biri.
Buryndary Kolýmbııa Venesýelany búlikshi sodyrlardy jasyrdy dep aıyptaǵan, al Venesýela muny joqqa shyǵarǵan. Dýke 2018 jyly bılikke kelgennen keıin qos el arasyndaǵy dıplomatııalyq qatynastardy úzdi.
Kolýmbııanyń eń iri búlikshi toby – solshyl ult-azattyq armııasy (ELN) Katatýmbo aımaǵynda áreket etedi. Osy aıdyń basynda ELN óziniń Kýkýttaǵy áskerı bazadaǵy mınalanǵan kóliktiń jarylysyna qatysy bar degendi joqqa shyǵarǵan-dy. Shabýylda 36 adam, onyń ishinde eki amerıkalyq áskerı keńesshi jaraqat alǵan.
