Batys Qazaqstan qaıtadan «qyzyl aımaqta»

Batys Qazaqstan oblysynyń bas memlekettik sanıtar dárigeri Muhamǵalı Aryspaevtyń jańa qaýlysy osy dúısenbiden bastap kúshine endi.
Pandemııa bastalǵaly oblys­ta 24 673 adamnyń koronavırýs juqtyrǵany anyqtalǵan. Al 1 maýsymnan beri ǵana Sovid-19 vırýsy 2 115 adamnan tabyldy. Sonyń ishinde 1 351 adam aýrý belgilerimen dárigerge qaralǵan, olardyń ja­qyn-jýyǵy arasynan taǵy 540 adamda ınfeksııa anyqtalǵan. Pro­fılaktıkalyq maqsatta tek­seril­genderden 205 adam, vahta­lyq aýysymnan shyǵarda ne kirerde, shetelge shyǵar aldynda, stasıonarlarǵa emdeýge jatqyzý aldynda epıdemıologııalyq qada­ǵalaý maqsatynda synama alyn­ǵandar arasynan 19 adamnyń vırýs juqtyrǵany belgili boldy.
Aýyryp qalǵandardyń 38,4%-y – turaqty jumysy bar azamat­tar. Biraq jumys istemeıtin turǵyndar men zeınetkerler arasynda da vırýs juqtyrǵandar az emes. Sa­raptama 202 oqýshy, 89 muǵalim, esh jerge barmaıtyn 69 bala, 53 stýdent, 47 medısına qyzmetkeri, túrli balalar uıymdaryndaǵy 15 bala, 7 balabaqsha tárbıeshisi,
6 sarbaz aýyryp qalǵanyn kórsetip tur.
1 maýsymnan beri zerthanalarda 56 291 PTR test zertteýi jasaldy, orta eseppen kúnine 2 084 test zerttelýde.
Saraptama nátıjesi qoǵam­dyq kólikter jáne adam kóp jınalatyn saýda úıleri, bazar­lar, medısınalyq uıymdar, qoǵam­dyq tamaqtaný oryndary vırýstyń negizgi oshaǵy bolyp otyr­ǵanyn kór­setken. Bas sanıtar dárigerdiń jańa qaýlysynda shekteýge ushy­raǵan nysandar da osylar.
Sonymen, 28 maýsymnan bas­tap óńirde jabyq bazarlar, saýda úıleri, qoǵamdyq tamaqtandyrý oryndary senbi, jeksenbi kúnderi jumysyn toqtatady. Biraq bul shekteý Ashyq jobasymen jumys isteıtinderge júrmeıdi. Ashyq bazarlar jumys isteı beredi.
Sondaı-aq jazǵy kafeler 07.00-den 22.00-ge deıin, Ashyq jo­basyna qatysqan bolsa, túngi saǵat 02.00-ge deıin ashyq bolady. Tek ujymdyq, saltanatty, otba­sylyq jáne basqa buqaralyq is-sharalardy ótkizýge bolmaıdy jáne kelýshiler sany 50 orynnan aspaýy tıis.
Budan bólek túngi jáne oıyn klýbtary, barlar, kalıan oryndary qyzmetine, sol sekildi Ashyq jobasyna qatysatyn nysandarda eske alý sharalaryn qospaǵanda, oıyn-saýyq, ujymdyq, otbasylyq (banketter, úılený toılary, mereıtoı, t.b.) jáne basqa adamdar kóp jınalatyn is-sharalardy ótkizýge bolmaıdy. Mundaı is-sha­ralardy uıymdastyrýshylar da, qatysýshylar da aıypqa tartylady.
Sońǵy aptada, ıaǵnı maýsymnyń 21-27 aralyǵynda ótken aptamen salystyrǵanda aýrýshańdyq 15,5%-ǵa ósken.
Sońǵy málimetke qaraǵanda óńirde epıdemııa bastalǵaly
24 673 adam koronavırýspen aýyrǵan, sonyń 19 904-i jazylyp shyqqan. Tek 27 maýsym kúni 101 adamnan vırýs anyqtaldy.
О́ńirde monıtorıngtik toptar karantın talaptaryn saqtamaǵan nysandardy anyqtap, jazaǵa tartýmen júıeli aınalysyp keledi. 1 maýsymnan beri olar 279 márte reıd júrgizip, 1 451 nysandy teksergen eken. Sonyń ishinde 30 nysanda tártip buzýshylyq anyq­talǵan. 7 hattama toltyrylyp, 889 685 teńgege aıyppul salynǵan.
Oblys aýmaǵynda indetke qarsy ekpe jumysy da júıeli júrýde. Búginde óńirde oblys boıynsha 66 ekpe pýnkti jumys isteıdi. 27 maýsymdaǵy málimetke qaraǵanda, vaksınanyń 1-komponentin 90 658 adam, 2-komponentin 59 961 adam alyp úlgergen.
Búgingi tańda Ashyq qosym­shasymen oblys boıynsha barlyǵy 515 nysan jumys isteıdi. 10 maý­symnan beri Ashyq jobasyna qatysatyn nysandarda «sary/qyzyl» mártebesi bar 108 adam anyqtaldy. Oral qalasynda «qyzyl» mártebesi bar 41 adam, «sary» mártebesi bar 35 adam, Aqsaı qalasynda «qyzyl» már­tebesi bar 4 adam, «sary» már­tebesi bar 2 adam anyqtaldy. Baı­terek aýdanynda da 2 «qyzyl»,
6 «sary» adam, Qaztalov aýdanynda 4 «sary», Aqjaıyq aýdanynda 4 «sary», Tasqala aýdanynda 1 «qyzyl», 1 «sary» mártebeli adam anyqtalǵan. Mun­daı tártip buzý­shylyq Terek­ti, Shyńǵyrlaý, Jańa­qala, Jánibek, Bókeıorda aýdandarynan da anyqtalǵan. Árıne, olar­dyń bári­ne de ákimshilik jaza qolda­nyldy.
О́ńirde «qyzyl aımaq» márte­be­si qanshaǵa sozylatynyn sarap­shylardyń ózi de tap basyp aıta almaı otyr. Bári de azamattardyń saq­tanýyna, karantındik saqtyq sharalarynyń saqtalýyna baılanysty.

Batys Qazaqstan oblysy